پاکستان تے حملہ مودی دی آخری غلطی ہووے گی: وزیراعظم
میرپور آزاد کشمیر: وزیراعظم عمران خان دا کہنا اے پاکستان تے حملہ مودی دی آخری غلطی ہووے گی تے پاکستان دا بچہ بچہ لڑے گا۔
میرپور آزاد کشمیر وچ یکجہتی ریلی نال خطاب کردیاں وزیراعظم آکھیا اللہ تعالیٰ نوں سب توں ودھ صبر دی صفت پسند اے۔ 5اگست دے بعد 80لکھ کشمیری مشکل ترین امتحان نال لنگھ رہے نیں، اللہ تعالیٰ ہر مشکل دے بعد آسانی دیندا اے، کشمیریاں لئی بڑا ویلا آن والا اے۔
وزیراعظم آکھیا 5اگست توں پہلاں دنیا کشمیر نوں بھل چکی سی، پاکستان دے سربراہ وی کشمیر دا ناں نہیں لیندے سن، اسلامی ممالک وی کشمیر دی گل نہیں کردے سن پر 5اگست دے بعد مسئلہ کشمیر عالمی سطح تے اجاگر ہویا، امریکا تے برطانیہ وچ کشمیر دا ایشو چکیا گیا، دنیا اج کشمیر دے لوکاں دے ھالات جان گئی اے، یورپی یونین دے 600ممبران پارلیمنٹ نے کشمیر توں کرفیو ہٹان دا مطالبہ کیتا۔
6مہینے وچ 3 واری اقوام متحدہ دی سلامتی کونسل وچ کشمیر دا ذکر ہویا۔
وزیراعظم آکھیا پاکستان پوری کوشش کر رہیا اے خطے وچ امن ہووے، مودی نے ساری انتخابی مہم وچ انتہا پسند بیانات دتے، جدوں وی کوئی لیڈر نفرت دی بنیاد تے ووٹ لیندا اے تے بڑی تباہی ہوندی اے، نریندر مودی پاکستان مخالف مہم چلا کے بھاری اکثریت نال الیکشن جتیا۔
وزیراعظم آکھیا جس دن کرفیو اٹھے گا مقبوضہ کشمیر وچ انساناں دا سمندر نکلے گا تے اک ای آواز آوے گی تے اوہ آواز آزادی دی ہووے گی جہدے بعد مودی کول کوئی راہ نہیں رہوے گا۔ مودی نے بیان دتا اے میں 11دن وچ پاکستان نوں فتح کر لواں گا، لگدا اے اوہنے دنیا دی تریخ نہیں پڑھی، اوہدی ڈگری جعلی سی۔ مودی ایس غلط فہمی وچ نہ رہوے کہ پاکستان تے حملہ کرکے بھارتی عوام دی توجہ ہٹا دیوے گا۔
بھارت نے جس دن حملے دی غلطی کیتی تے پاکستان دا بچہ بچہ آخری ساہ تک لڑے گا، اسیں مقابلہ کراں گے تے کرکے دکھاواں گے، پاکستانی فوج نے دہشت گردی دے خلاف اوہ جنگ جتی اے جو دنیا دی وڈی وڈی فوجاں نہیں جت سکیاں۔
