14فروری نوں پارلیمنٹ دا مشترکہ اجلاس بلان دا فیصلہ، ترک صدر خطاب کرن گے

اسلام آباد: سپیکر قومی اسمبلی اسد قیصر نے پارلیمنٹ دا مشترکہ اجلاس 14فروری نوں بلان دا اعلان کر دتا۔ ترک صدر رجب طیب اردوان اجلاس نال خطاب کرن گے۔

سپیکر اسد قیصر آکھیا ساریاں جماعتاں مشترکہ اجلاس وچ ارکان دی حاضری یقینی بنان۔ خیال رہوے ترک صدر رجب طیب اردگان دے دورہ پاکستان دا ابتدائی شیڈول تیار کر لیا گیا، جہدے مطابق ترک صدر دا 13تے 14فروری نوں دورہ پاکستان دا قوی امکان اے، اوہ کاروباری شخصیات سنے اعلیٰ سطح وفد دے نال اسلام آباد اپڑن گے۔

ترک صدر پاکستانی سیاسی و عسکری قیادت نال اہم ملاقاتاں کرن گے جد کہ صدر، وزیراعظم، ترک صدر تے پروہنیاں دے اعزاز وچ ضیافتاں دا اہتمام کرن گے، پاک، ترک اعلیٰ سطح تذویراتی تعاون کونسل دا اجلاس منعقد ہووے گا۔

وزیراعظم عمران خان تے ترک صدر دی مشترکہ صدارت کرن گے، کئی معاہدے، تعاون دی یادداشتاں تے دستخط تے کئی منصوبے شروع ہون گے، ترک صدر دے دورے دے دوران تذویراتی اقتصادی فریم ورک، باہمی تعاون دے تحت معاہدات دا امکان اے جد کہ سرمایہ کاری، تجارت، دفاعی پیداوار ، بینکنگ، مالیات وچ تعاون ودھایا جاوے گا۔