شریف فیملی حکومت توں4لوکاں لئی ڈیل منگ رہی اے،شہباز گل

لہور(پنجابی میڈیا گروپ)وزیراعظم عمران خان دے معاون خصوصی برائے سیاسی ابلاغ شہباز گل نے دعوی کیتا اے کہ شریف فیملی حکومت توں4لوکاںدی ڈیل منگ رہی اے تاکہ ایہ لوگ ملک توں باہر جا سکن۔فیصل آباد وچ میڈیا نال گل بات وچ شہباز گل دا کہنا سی کہ ڈیل منگی جارہی اے کہ شہبازشریف،مریم نوںوی باہرجان دتاجائے،شاہد خاقان ایتھے رہن گے۔اوہناں نے آکھیا کہ جناں4بندیاں دی ڈیل منگی گئی اے،اوہناں وچ شہبازشریف،اوہناںدا پُتر،نوازشریف تے اوہناں دی دھی شامل اے۔اوہناں دا کہنا سی کہ تہانوں تے ڈیل تے ڈھیل جنیاں میسرآنیاں سن آگئیاں،شریف فیملی نوں ڈیل نہیں ملے گی، تہاڈے سامنے عمران خان کھڑا اے،اسیں تہانوںاُبلیا ہویاآلونہیں دیواں گے،تُسی چکن برگرمنگ رہے او،تہانوںڈیل ملن والی نہیں تہاڈے مقدر وچ گالیاں دینا تے کھانا لکھیا ہویا اے۔معاون خصوصی دا کہنا سی کہ احتساب ہوئے گا تے چھیتی ہی شہباز شریف سلاخاں پیچھے ہوون گے،چپراسیاں دے اکائونٹاں وچ ارباں روپے کیتھوں آئے ایس داجواب دینا پئے گا۔