تعلیمی ادارے ہفتے وچ3دن کھولن دی تجویز

اسلام آباد(پنجابی میڈیا گروپ)ملک بھر وچ کورونا وائرس دے نویں ویرینٹ اومی کرون دے کیس ودھن توں بعد تعلیمی اداریاں نوں ہفتے وچ3دن کرن دی تجویز ساہمنے آگئی اے۔نیشنل کمانڈ اینڈ آپریشن سنٹر (این سی او سی)دا دُوجا اہم اجلاس ہویا جس وچ تعلیمی اداریاں دی صورتحال دا وی جائزہ لیا گیا جدکہ اجلاس وچ نویاںبندشاں دے حوالے نال مختلف تجویزاں زیر غورآیاں۔اجلاس وچ تعلیمی اداریاں نوں ہفتے وچ3دن کرن تے اسلام آباد وچ7دناں لئی سکولاں نوںآن لائن کرن دی وی تجویز زیر غور آئی۔ذرائع دے مطابق این سی او سی اجلاس وچ تعلیمی اداریاں وچ جاری ٹیسٹنگ اُتے بریفنگ دتی گئی،ایس او پیز اُتے عمل درآمد نہ کرن والے تعلیمی اداریاں نوں سیل کرن دا فیصلہ کیتا گیا جدکہ تعلیمی اداریاں وچ طالب علماں تے ٹیچراں دی لازمی ویکسینیشن لئی زور دتا گیا۔ملک وچ کوروناتیز ہون نال 24گھنٹے دے دوران مثبت کیساں دی شرح9.45فیصد ریکارڈملک وچ کورونا دے پھیلن نے خطرے دی گھنٹی وجادتی،24گھنٹے دے دوران مثبت کیساں دی شرح تے اعشاریہ چار5فیصد ریکارڈ کیتی گئی۔کورونا وائرس نال10افراد جاں بحق ہوگئے،جس توں بعد موتاںدی تعداد29ہزار29ہوگئی۔پاکستان وچ کورونا دے تصدیق شدہ کیساں دی تعداد13لکھ33ہزار521ہوگئی۔نیشنل کمانڈ اینڈ آپریشن سینٹر دی تازہ رپورٹ دے مطابق پچھلے24گھنٹے دے دوران5ہزار34نویںکیساں رپورٹ ہوئے،پنجاب وچ4لکھ54ہزار372،سندھ وچ5لکھ5ہزار930،خیبرپختونخوا وچ اک لکھ82ہزار419،بلوچستان وچ 33ہزار729،گلگت بلتستان وچ10ہزار446،اسلام آباد وچ1لکھ11ہزار855جدکہ آزاد کشمیر وچ34ہزار770کیس رپورٹ ہوئے۔ملک بھر وچ ہن تک2کروڑ42لکھ39ہزار761افراد دے ٹیسٹ کیتے گئے،پچھلے24گھنٹے دے دوران53ہزار253نویں ٹیسٹ کیتے گئے،ہن تک12لکھ64ہزار611مریض صحت یاب ہوچکے نیں جدکہ827مریضاں دی حالت تشویشناک اے۔پاکستان وچ کورونا پاروںاک دن وچ10افراد جاں بحق ہوئے،جس توں بعد وائرس نال مرنے والیاںدی تعداد29ہزار29ہوگئی۔پنجاب وچ13ہزار91،سندھ وچ7ہزار703،خیبرپختونخوا وچ5ہزار953،اسلام آباد وچ969،بلوچستان وچ367،گلگت بلتستان وچ187تے آزاد کشمیر وچ749مریض جان توں ہتھ دھو بیٹھے۔