کراچی سرکلر ریلوے بحالی کیس: چیف جسٹس دا اک ہفتے وچ قبضہ ختم کران دا حکم
کراچی: سرکلر ریلوے بحالی کیس وچ سپریم کورٹ نے اک ہفتے وچ قبضہ ختم کران دا حکم دے دتا۔ چیف جسٹس گلزار احمد نے برہمی دا اظہار کردیاں آکھیا تسیں کم نہیں کر سکدے تے گھر جاؤ، سندھ حکومت نے سرکلر ریلوے دی بحالی دی ذمہ داری لئی سی، عدالت دے حکم تے عمل کیوں نہیں ہویا۔
سپریم کورٹ کراچی رجسٹری وچ کراچی سرکلر ریلوے دی بحالی دے کیس دی سماعت ہوئی۔ عدالتی احکامات تے ایڈووکیٹ جنرل سندھ نے پچھلی سماعت دا حکم نامہ پڑھیا۔
عدالت آکھیا دسو کراچی سرکلر ریلوے دی بحالی بارے کیہنے کیہ عملدرآمد کیتا، اسیں جاننا چاہنے آں ہن تک کیہ پیش رفت ہوئی، اسیں تہاڈی رپورٹ پڑھی اے پر عملدرآمد نہیں ہو رہیا۔ چیف جسٹس گلزار احمد نے استفسار کیتا سیکرٹری ریلوے کتھے نیں، تسیں کراچی سرکلر ریلوے بحال نہیں کیتا، تسیں آکھیا سی آپ بحال کراں گے، الٹا ایہنوں سی پیک وچ پا دتا، سانوں کہانیاں نہ سناؤ، بابو دی طرح گل نہ کرو۔
سیکرٹری ریلوے آکھیا کراچی سرکلر ریلوے دی بحالی دی سندھ حکومت نے ذمہ داری لئی سی۔
چیف جسٹس آکھیا تسیں کم نہیں کر سکدے تے گھر جاؤ، تسیں منشی نہیں، سیکرٹری ریلوے او۔چیف جسٹس گلزار احمد آکھیا میئر صاحب، کراچی دے اصل سربراہ تے تسیں او، دسو کیہ کیتا تسیں، کمشنر صاحب، سن لو اک ہفتے وچ ریلوے دی زمین توں قبضے ہٹاؤ، ریلوے دی ہاؤسنگ سوسائٹیاں ہون یاں پٹرول پمپ جو راستے وچ آندا اے سب ڈیگ دیو، سانوں اصل حالت وچ کراچی سرکلر ریلوے چاہیدا اے، عدالت نوں مطمئن نہ کر سکے تے سب نوں توہین عدالت دے نوٹس جاری کراں گے۔
