پاکستان دے خلاف کسے وی قسم دی مہم جوئی نکام بنا دیواں گے: کور کمانڈرز دا عزم
راولپنڈی: پاک فوج دے سربراہ جنرل قمر جاوید باجوہ دی زیر صدارت ہون والی کور کمانڈرز کانفرنس وچ بھارتی قیادت دے غیر ذمہ دارانہ بیانات دی شدید مذمت کردیاں آکھیا گیا اے ایہدے خطے تے منفی اثرات پین گے۔ پاکستان دے خلاف کسے وی قسم دی مہم جوئی نوں نکام بنا دتا جاوے گا۔
پاک فوج دے ترجمان میجر جنرل بابر افتخار ولوں سماجی رابطیاں دی ویب سائٹ ٹویٹر تے جاری بیان وچ دسیا گیا اے آرمی چیف جنرل قمر جاوید باجوہ دی زیر صدارت کور کمانڈر کانفرنس جی ایچ کیو وچ منعقد ہوئی۔
آرمی چیف جنرل قمر جاوید باجوہ دی سربراہی وچ ہون والی کور کمانڈرز کانفرنس وچ جیو سٹرٹیجک ماحول خصوصاً ملک دی اندرلی تے سرحدی صورتحال دا وی جائزہ لیا گیا۔
کور کمانڈرز کانفرنس وچ بھارتی قیادت دے اشتعال انگیز بیانات دی مذمت کردیاں آکھیا گیا غیر ذمہ دارانہ بیانات دے خطے تے منفی اثرات پین گے۔
کانفرنس دے شرکاء نے ایس عزم دا اعادہ کیتا پاکستان دی مسلح افواج مادر وطن دے دفاع لئی ہر ویلے تیار نیں۔ بھارتی ظلم و جبر کشمیریاں دے حق خو ارادیت نوں نہیں دبا سکدا۔ پاکستان دے خلاف کسے وی قسم دی مہم جوئی نوں نکام بنا دتا جاوے گا۔
ایس موقع تے اپنے خطاب وچ آرمی چیف جنرل قمر جاوید باجوہ دا کہنا سی بھارتی ظلم و جبر کشمیریاں دے حق خود ارادیت نوں نہیں دبا سکدا۔ قابض بھارتی فوج کشمیریاں نوں حق خود ارادیت توں نہیں روک سکدی، اوہناں دی جدوجہد کامیاب ہووے گی۔
کشمیری اقوام متحدہ دی قرارداداں دے مطابق اپنا حق لے کے رہواں گے۔ ڈی جی آئی ایس پی آر میجر جنرل بابر افتخار نے اپنے ٹویٹ وچ دسیا کہ کانفرنس دے شرکاء نوں آپریشن ردالفساد تے وی تفصیلی بریفنگ دیندیاں آگاہ کیتا گیا کہ ایہدے نتیجے وچ ملکی سکیورٹی صورتحال بہت بہتر ہوئی، ملک دیرپا امن تے استحکام ول ودھ رہیا اے۔
