آئی ایم ایف توں ٹیکس ہدف وچ کمی دی بھیک معاشی تباہی دا اعلان اے: شہباز شریف

لہور: شہباز شریف نے معیشت دی تباہی تے دکھ تے تشویش دا اظہار کردیاں آکھیا اے کرپٹ نالائق حکومت دی آئی ایم ایف توں 800ارب ٹیکس وصولی ہدف وچ کمی دی بھیک معاشی تباہی دا اعلان اے۔

مسلم لیگ (ن) دے صدر تے قائد حزب اختلاف شہباز شریف نے اپنے ردعمل وچ آکھیا ملکی تریخ دا سب توں وڈا 9.5فیصد دا متوقع خسارہ قوم تے ملک لئی بربادی دا سامان تے بری خبر اے، کرپٹ تے نالائق ٹولے دا کیتا کرایا اے ملک و قوم ایس بدقسمت صورتحال نال دودچار اے، معاشی خسارہ چیخ چیخ کے خبردار کر رہیا اے اندرونی و بیرونی قرض تے مہنگائی دا خوفناک طوفان آ رہیا اے۔

شہباز شریف دا کہنا سی بے حسی و سفاکی اے کہ حکومت نے ترقیاتی بجٹ تے انکم سپورٹ تے کلہاڑا چلادتا، معاشی سرگرمیاں دے جمود نے لکھاں چولہے بند تے عوام نوں غربت دے جہنم وچ دھکیل دتا۔ اوہناں آکھیا آٹے تے کنک دا بحران تھلیوں نہیں اُتوں پیدا کیتا گیا، حواری غریباں دی جیب صاف کر چکے نیں، 11ہزار ارب قرض صرف 18مہینے وچ لے کے ریکارڈ قائم کرن والے قوم دے مجرم نیں۔