سپریم کورٹ دا کراچی وچ کنٹونمنٹ بورڈ وچ غیر قنونی عمارتاں ڈیگن دا حکم

کراچی: سپریم کورٹ نے کلفٹن کنٹونمنٹ بورڈ دی حدود وچ قائم غیر قنونی عمارتاں ڈیگن دا حکم دے دتا۔ چیف جسٹس پاکستان جسٹس گلزار احمد دی سربراہی وچ سپریم کورٹ دے تن رکنی بنچ نے کراچی کنٹونمنٹ بورڈ علاقیاں وچ تجاوزات دے خلاف کیس دی سماعت کیتی۔ چیف جسٹس نے پچھیا دہلی کالونی، پنجاب کالونی وچ تعمیرات کیویں ہو رہیاں نیں؟

کنٹونمنٹ بورڈ حکام عدالت وچ پیش ہوئے تے آکھیا اسیں تجاوزات دے خلاف ایکشن لیا اے، کاروائی کر رہے آں۔

چیف جسٹس آکھیا اٹارنی جنرل صاحب ایہ دسو کنٹونمنٹ بورڈ وچ ایہ تعمیرات کیویں ہوئیاں تے کِنے اجازت دتی، 9,9منزلہ عمارتاں بن رہیاں نیں، ایہناں سب نوں ڈیگو۔

عدالت نے گزری روڈ، پنجاب کالونی، دہلی کالونی، پی این ٹی وچ بلند وبالا غیر قنونی تعمیرات ڈیگن دا حکم دے دتا۔

اٹارنی جنرل آکھیا ایس حوالے نال بہت سارے مقدمات زیر سماعت نیں، حکم امتناعی تک کیویں ڈیگ سکدے او۔ چیف جسٹس نے حکم دتا ایہ تے انج ای چلدا رہوے گا تہانوں سخت ایکشن لینا ہووے گا، پلس والیاں دی گڈی کھڑی کرکے سب تعمیرات ہو جاندیاں نیں، تسیں بلند و بالا عمارتاں ڈیگو تے پارک بنا دیو۔