ملک وچ مہنگائی دی شرح 2 ورھیاں دی اُچی سطح اُتے اپڑ گئی

اسلام آباد( پنجابی میڈیا گروپ) ملک وچ مہنگائی دی شرح 2 ورھیاں دی اُچی سطح اُتے اپڑ گئی، مہینے وار جنوری دے دوران ملک وچ مہنگائی 0.39 فیصد ودھی ۔میڈیا دے مطابق جنوری وچ مہنگائی دی شرح 12.96 فیصد اُتے اپڑ گئی اے جدکہ ایس مالی سال دے پہلے 7 مہینے جولائی تو جنوری دے دوران مہنگائی دی اوسط شرح 10.26 فیصد رہی۔ملک وچ مہنگائی دی شرح ودھن دی بنیادی وجہ پیٹرول دی قیمت تے ٹرانسپورٹ دے کرائے ودھنا اے، مالی سال دے دوران پیٹرول، ڈیزل، بتی تے کھان پین دیاں کئی شیواں دیاں قیمتاں ہور ودھیاں نیں ایس دے علاوہ صحت، تعلیم تے تفریحی سہولتاں وی مہنگیاں ہویاں۔ایس حوالے نال وفاقی ادارہ شماریات نے مہینے وار دی رپورٹ جاری کردتی جس وچ دسیا گیا اے کہ ایس مالی سال دے پہلے 7مہینے جولائی توں جنوری مہنگائی دی اوسط شرح 10.26 فیصد رہی جد کہ دسمبر 2021 وچ مہنگائی دی شرح 12.3 تے جنوری 2021 وچ 5.7 فیصد رہی۔رپورٹ وچ دسیا گیا اے کہ جنوری وچ سالانہ بنیاداں اُتے کوکنگ آئل 54.33 فیصد، گھیو 47.4 تے دال مسور 41.3 فیصد مہنگی ہوئی جد کہ پھل 28.35 فیصد مہنگے ہوئے۔ سالانہ بنیاداں اُتے سبزیاں تے چکن وی مہنگے ہوئے۔