وزیراعظم تے ابوظہبی دے ولی عہد دا ٹیلیفون اُتے رابطہ

اسلام آباد ( پنجابی میڈیا گروپ) وزیراعظم عمران خان دا ابوظہبی دے ولی عہد شیخ محمد بن زید النہیان نال ٹیلیفون اُتے رابطہ ہویا جس وچ اوہناں نے متحدہ عرب امارات دے خلاف حوثیاں ولوں میزائل حملے دی حالیہ کوشش دی شدید مذمت کیتی ۔ تفصیل دے مطابق وزیراعظم تے ابوظہبی دے ولی عہد نال ٹیلیفون رابطے وچ عمران خان نے متحدہ عرب امارات دے بروقت تے موثر فضائی دفاعی ردعمل دی تعریف کیتی ۔ وزیراعظم نے متحدہ عرب امارات دی قیادت تے عوام نال مکمل یکجہتی تے حوثی باغیاں دے میزائل حملے ودھن اُتے گہری تشویش دا اظہار کیتا ۔ اوہناں نے مذاکرات دے ذریعے علاقائی امن و سلامتی دیاں کوششاں وچ پاکستان دی مسلسل حمایت دااعادہ کیتا جدکہ دوناں رہنماواں نے دوطرفہ تعاون تے باہمی دلچسپی دے امور اُتے وی تبادلہ خیال کیتا۔ٹیلیفون اُتے رابطے وچ وزیراعظم عمران خان تے ابوظہبی دے ولی عہد نے اعلی سطح اُتے رابطے جاری رکھن اُتے وی اتفاق کیتا ۔