عوامی شکایتاں ختم کرنا سرکار دا پہلی ترجیح اے، وزیراعظم

لہور( پنجابی میڈیا گروپ) وزیراعظم عمران خان ہوراں آکھیا کہ حکومتی اداریاں دا کم عوام نوں سہولت دینا تے عوامی شکایتاںدا ترجیحی بنیاداں اُتے ازالہ کرنا اے۔ میڈیا دے مطابق وزیرِ اعظم عمران خان دی زیرِ صدارت اسپیشل اکنامک زونز اُتے اعلی سطح دا اجلاس ہویا، جس وچ وفاقی وزیراں شوکت ترین، اسد عمر، حماد اظہر، فواد چوہدری، خسرو بختیار، مشیرِ صنعت و تجارت عبدالرزاق داد، معاونینِ خصوصی شہباز گِل، خالد منصور، چئیرمین سرمایہ کاری بورڈ اظفر احسن تے متعلقہ افسراں نے رلت کیتی ، جد کہ صوبائی وزیرِ صنعت پنجاب میاں اسلم اقبال تے صوبائی چیف سیکٹریاں تے افسراں نے وڈیو لنک دے ذریعے اجلاس وچ رلت کیتی۔اجلاس نوں رشکئی، دھابیجی، بوستان تے علامہ اقبال انڈسٹریل سٹی دے علاوہ ایم3انڈسٹریل زون اُتے تفصیلی بریفنگ دتی گئی، تے دسیا گیا کہ ایم تھری اکنامک زون وچ صنعتاں دے قیام لئی600ایکڑ زمین میسر کردتی گئی اے ، ایس دے علاوہ بتی دی فراہمی توں بعد انفراسٹرکچر اُتے کم تیزی نال جاری اے، اجلاس نوں سرمایہ کاری بورڈ ولوں مقامی تے باہر دے سرمایہ کاراں لئی صنعتاں دے قیام وچ آسانی لئی چُکے گئے حکومت دے اقدامات توں وی آگاہ کیتا گیا ،وزیرِ اعظم نے سارے اقدمات دی معینہ مدت وچ تکمیل نوں یقینی بنان دی ہدایت جاری کیتی۔ایس موقع اُتے وزیراعظم عمران خان دا کہنا سی کہ حکومت دی کاروبار دوست پالیسیاں دی بدولت پاکستان خطے بھر وچ صنعتاں وچ سرمایہ کاری لئی ایس ویلے موزوں ترین ملک اے، صنعتاں وچ بیرونی سرمایہ کاری نال نہ صرف روزگار تے برآمدات ودھے گی بلکہ ٹیکنالوجی دی منتقلی ممکن ہوئے گی، حکومت ترجیحی بنیاداں اُتے اسپیشل اکنامک زونز دا نظام پلگ اینڈ پلے (Plug and Play) ماڈل اُتے یقینی بنا رہی اے، تریخ وچ پہلی وار اسپیشل اکنامک زونز دے بورڈ آف گورنرز تے انتظامیہ دی تقرری وچ میرٹ دی بالادستی تے مفادات دے عدم ٹکرا ورگے پہلوواں نوں مد نظر رکھیا جا رہیا اے۔