چئیرمین پاکستان تحریک اتحاد چودھری اورنگزیب دی گورنر پنجاب نال ملاقات

لہور () چیئرمین پاکستان تحریک اتحادچودھری اورنگزیب تے گورنر پنجاب چودھری محمد سرور وچ ملاقات ہوئی جہدے وچ موجودہ سیاسی حالات زیر بحث آئے۔ دونویں رہنماواں نے اتفاق کیتا کہ وِگڑدے ہوئے عالمی حالات دے تناظر وچ قوم دا اِک مُٹھ ہونا بہت ضروری اے تاں جے اوہناں چیلنجاں نال نِبڑیا جا سکے جہڑے ساہنوں درپیش ہو سکدے نیں۔ ایس موقعے اتے چودھری اورنگزیب نے آکھیا کہ ساڈا مقصد ای ملکی مفاد دے اک نکتے اتے جمع ہو کے معاملات نوں حب الوطنی دے زاویے نال ویکھنا اے۔ اسیں ایسے سیاسی نظریے نوں رہنما بنا کے ایہہ کوشش کر رہے آں کہ پوری قوم نوں اک پلیٹ فارم اتے اکٹھا کر کے ملکی ترقی لئی عملی اقدامات کیتے جان۔ گورنر پنجاب نے قائد تحریک دے وژن دی تعریف کردے ہوئے آکھیا کہ اسیں سب توں پہلے پاکستانی آں‘ساڈی سیاسی یا نظریاتی وابستگیاں اوہدے مگروں نیں جہڑا منشور تحریک اتحاد لے کے نکلی اے۔ اسیں امید کرنے آں کہ ایس توں اتحاد امہ دی راہواں نکلن گِیاں۔ دونویں رہنماواں نے وزیراعظم دے دورہ روس نوں مثبت قرار دیندے ہوئے آکھیا کہ کسے وی ریاست نوں اپنے ہمسائیاں سنے ساری معاشی تے عسکری قوتاں نال بہتر تعلقات رکھنے چاہیدے نیں۔چودھری اورنگزیب دا ایہہ وی آکھنا سی کہ روس تے یوکرین دے وگڑدے حالات وچ وزیراعظم نوں اپنا کردار ادا کرنا چاہیدا اے تاں جے خطہ اک نویں تباہی نال دوچار نہ ہووے۔ دونویں رہنماواں نے اتفاق کیتا کہ روس تے یوکرین وچ کشیدگی ودھدی اے تے خطے وچ مہنگائی دا نواں طوفان آوے گا جہدے سامنے بند بنھنا اوکھا ہووے گا۔