شہریاں لئی چنگی خبر، بجلی دی قیمت وچ وادھے دا فیصلہ موخر

اسلام آباد: سینٹرل پاور پرچیزنگ ایجنسی نے بجلی دی قیمت وچ اٹھانوے پیسے فی یونٹ وادھے دا فیصلہ موخر کر دتا اے۔

سینٹرل پاور پرچیزنگ ایجنسی (سی پی پی اے) ولوں نومبر دی فیول پرائس ایڈجسٹمنٹ دی مد وچ اٹھانوے پیسے فی یونٹ وادھے دی درخواست تے سماعت ہوئی۔

چیف ایگزیکٹو عابد لطیف لودھی دا کہنا سی سی پی پی اے فیول پرائس ایڈجسٹمنٹ دے طریقہ کار وچ تبدیلیاں کرنا چاہندا اے۔ عوام دوست تبدیلیاں دی تجاویز تیار کیتی گئیاں نیں۔

اوہناں نے نیشنل الیکٹرک پاور ریگولیٹری اتھارٹی (نیپرا) توں نومبر دی فیول پرائس ایڈجسٹمنٹ وچ تاخیر دی درخواست کیتی جہنوں منظور کر لیا گیا۔

خیال رہوے کہ ماہانہ فیول ایڈجسٹمنٹ دی مد وچ بجلی اٹھانوے پیسے یونٹ مہنگی کرن دی سفارش کیتی گئی سی۔ ایہ وادھا ماہانہ فیول ایڈجسٹمنٹ دی مد وچ کیتا جانا سی۔