سرکار آٹے کھنڈ دا جواب دیوے ، شاہد خاقان
اسلام آباد: سابق وزیراعظم شاہد خاقان عباسی آکھیا اے حکومت ملکی معیشت دی جہڑی تصویر وکھا رہی اے عوام ایہدے توں بے خبر نیں، ماضی وچ کھنڈ 43روپے کلو سی، اج 90تک اپڑ گئی۔
آٹے تے کھنڈ دی قیمت وچ وادھے دا سرکار کول کوئی جواب نہیں۔
قومی اسمبلی توں خطاب دے دوران حکومت تے تنقید کردیاں ن لیگی رہنما شاہد خاقان دا کہنا سی اک وزیر نے بیان دتا کہ موسمیاتی تبدیلی پاروں آٹا مہنگا ہویا، ا ک خاتون وزیر نے اسلام آباد توں شاپنگ بیگ ختم کر دتے، فواد چودھری سانوں چن تے لے کے جان گے، اسیں ایہدا انتظار کر رہے آں، کسے اک وزیر دی کارکردگی وکھا دیو۔
ایہناں وزیراں دی تقریراں سن لو، کیہ ایس طرح ملک چلے گا۔ اوہناں آکھیا قرض لے کے گزارہ کیتا جا رہیا اے، موجودہ حکومت نے 5ورھے پورے کر لئے تے قرضہ دگنا ہو چکیا ہووے گا۔
بجلی تے گیس دیاں قیمتاں کتھوں تک اپڑ گئیاں نیں۔ آٹے تے کھنڈ دے بحران تے خصوصی کمیٹی بنائی جاوے۔ آئین کہندا اے بجلی تے گیس دے معاملات صوبیاں دے حوالے کر دیو۔
اوہناں نے مہنگائی دے معاملے تے حکومت نوں وارننگ دیندیاں آکھیا عوام سڑکاں تے نکل آئے تے تھاں نہیں ملے گی۔
