سارے مسئلیاں دی جڑ 30ہزار ارب دا قرض، روپے تے چھاپ سکنے آں ڈالر نہیں: حفیظ شیخ

اسلام آباد: عبدالحفیظ شیخ آکھیا اے سارے مسئلیاں دی جڑ 30ہزار ارب دا قرض اے، حکومت آئی تے جاری کھاتیاں دا خسارہ ریکارڈ سطح تے سی، ملک وچ ڈالر دا نہ ہونا بحران دی وڈی وجہ اے، روپے تے چھاپہ سکنے آں ڈالر نہیں، پچھلے 7مہینے وچ پٹرولیم مصنوعات دی قیمتاں وچ وادھا نہیں ہویا۔

مشیر خزانہ عبدالحفیظ شیخ نے قومی اسمبلی وچ اظہار خیال کردیاں آکھیا 72ورھیاں وچ کوئی وزیراعظم مدت پوری نہ کر سکیا، ایس دوران اسیں ٹیکس کولیکشن تے سرمایہ کاراں نوں راضی کرن وچ وی کامیاب نہ ہو سکے، سوچنا ہووے گا اجیہا کیہ اے کہ گروتھ ریٹ برقرار نہیں رہ سکدا؟ معیشت دے اثرات براہ راست لوکاں تے پے رہے نیں۔ حفیظ شیخ دا کہنا سی ترقی کرنی اے تے اپنے لوکاں تے دھیان دینا ہووے گا، سانوں طے کرنا اے ملک نوں اگے لے کے جانا اے یاں نہیں، معاشی استحکام لئی حکومت کم کر رہی اے، کوشش کراں گا سیاسی بحث تے پوائنٹ سکورنگ نہ کراں، ترقی یافتہ ملکاں نے تجارت لئی ماحول پیدا کیتا، 1960دے دوران معیشت وچ بہتری آئی جہڑی 4سال وچ ختم ہو گئی۔ مشیر خزانہ نے ہور آکھیا فیصلہ ہویا سی ایکسچینج ریٹ نوں فکس رکھنا اے، وزیراعظم کناں وی طاقتور ہووے کرنسی دی قدر نوں حکم نال نہیں روک سکدا، کرنسی دی قدر وچ کمی روکن لئی ڈالر پھونکے گئے، 2ہزار 300ارب روپے آمدن توں ودھ خرچ کیتے گئے، بحران دی وجہ ایہ اے کہ ملک وچ ڈالر نہیں، اسیں قرض وی ڈالرز وچ لئے۔ مشیر خزانہ آکھیا کامیاب جوان پروگرام دے تحت نوجواناں نوں کاروبار شروع کرن لئی آسان قرض فراہم کر رہے آں، اسیں چاہنے آں کمزور تے غریب ترین طبقے دی مدد کریئے، کمزور ترین طبقیاں لئی پروگراماں دا بجٹ 192ارب کیتا جہڑا تریخ وچ کدی نہیں ہویا۔