سپریم کورٹ دا 3مہینے وچ کراچی سرکلر ریلوے نوں مکمل فعال کرن دا حکم

اسلام آباد: سپریم کورٹ نے 3مہینے وچ کراچی سرکلر ریلوے نوں مکمل آپریشنل کرن دا حکم دے دتا۔ چیف جسٹس گلزار احمد دی زیر صدارت سپریم کورٹ وچ ریلوے خسارہ کیس دی سماعت ہوئی۔ وزیر ریلوے شیخ رشید احمد تے وزیر منصوبہ بندی اسد عمر عدالت وچ پیش ہوئے۔

چیف جسٹس گلزار احمد نے شیخ رشید توں آکھیا بزنس پلان وچ تسیں سب کجھ کہہ دتا پر ایہ نہیں دسیا ایہدے تے کدوں تے کیویں عمل ہووے گا، جہدے تے شیخ رشید آکھیا جہڑا کم 70ورھیاں وچ نہیں ہویا اوہ 12دن وچ ہوگیا۔ چیف جسٹس آکھیا اسیں تہاڈے شکر گزار آں، ایہ کم نہ میری ذات لئی نہ تہاڈی ذات لئی اے سگوں قوم لئی ہو رہیا اے، ایم ایل ون بارے پتہ چلیا اے ایلی وٹیڈ ٹرین بنا رہے آں، ریلوے جے اپنی پنج جائیداداں فروخت کر دیوے تے سارے مسئلے حل ہو جان گے۔چیف جسٹس آکھیا ایم ایل ون لمی کہانی اے جہدے تے شیخ رشید آکھیا 14ورھیاں بعد ایم ایل ون دا ٹینڈر ہو رہیا اے، پنج ورھے وچ ایم ایل ون مکمل ہو جاوے گا، کراچی سرکلر ریلوے لئی پچھلی رات عمارتاں ڈیگیاں نیں، سندھ حکومت وی تعاون کر رہی اے۔عدالت نے ایم ایل ون منصوبہ دو سال وچ فعال بنان دا حکم دیندیاں آکھیا دتی گئی مدت تے عمل نہ ہون دے نتائج خطرناک ہون گے، عدالت دی ٹائم لائن ریلوے لئی چیلنج اے، جے عملی طور تے ممکن نہیں تے ریلوے بند کر دیو، کیس دی اگلی سماعت 21فروری نوں کراچی رجسٹری وچ ہووے گی۔