پاکستان نوں دانستہ معاشی دیوالیہ پن ول دھرویا جا رہیا اے، شہباز شریف دا الزام

لندن: پاکستان مسلم لیگ (ن) دے صدر تے قائد حزب اختلاف شہباز شریف نے معاشی خطرات تے اظہار تشویش کردیاں آکھیا اے پاکستان نوں دانستہ معاشی دیوالیہ پن ول دھرویا جا رہیا اے۔ میاں شہباز شریف ولوں جاری بیان وچ آکھیا گیا اے معیشت دی تباہی نال پاکستان دی سالمیت اندروں کھوکھلی ہو رہی اے۔

صحت مند ہوندی تے ڈُبدی معیشت نوں کرپٹ ٹولے نے تباہ کر دتا اے۔ قائد حزب اختلاف آکھیا سود دی شرح تے بجلی تے گیس دیاں قیمتاں ودھا کے عوام دا معاشی قتل عام کیتا گیا۔ 11ہزار ارب قرض ملک نوں معاشی بیڑیاں وچ جکڑن لئی لیا گیا، جہدا قوم نوں فائدے دی بجائے نقصان ہویا۔

اوہناں دا کہنا سی عوام، تاجر تے سیاستدان معیشت بچان لئی متحد تے تیار ہو جان۔ عوام تے ملک دا معاشی قتل ہور برداشت نہیں کیتا جاوے گا۔ اوہناں نے الزام لایا کہ آٹا تے چینی چور وزیراعظم عمران خان دی سرپرستی وچ محفوظ جد کہ بے قصور تاجراں نوں جیلاں وچ بند کیتا جا رہیا اے۔