تحریک عدم اعتماد ملک نوں مسائل توں کڈن لئی اہم سنگ میل ثابت ہوئے گی،شہباز شریف

اسلام آباد(پنجابی میڈیا گروپ) پاکستان مسلم لیگ(ن)دے صدر شہباز شریف نے آکھیا اے کہ پاکستان دی22کروڑ عوام دے مطالبے اُتے پیش کردہ تحریک عدم اعتماد اج انشاء اللہ پاکستان نوں مایوسیاں تے مسائل دے اندھیریاں وچوں کڈن وچ اہم سنگ میل ثابت ہوئے گی۔اپنے بیان وچ اپوزیشن لیڈر نے آکھیاکہ پاکستان نوں اجتماعی دانش،یکجہتی تے اتفاق رائے دے مرہم دی ضرورت اے،اسیں اک قوم بن کے مسائل دے طوفاناں دازور توڑاں گے،معیشت نوں درست پاسے استوار کرکے مہنگائی دی ستائی عوام دی دادرسی کرنی اے،روزگار دی فراہمی نال غریباں دے چولہے فیر توں جلن گے۔اپوزیشن لیڈر نے آکھیاکہ عالمی سطح اُتے پاکستان دے مقام تے تعلقات نوں قومی وقار تے مفادات دی بنیاد اُتے بحال کرنا اے۔اوہناںںنے آکھیاکہ قیادت دا امتحان ای مشکل ترین حالات وچ ہندا اے،اللہ تعالی دے فضل و کرم نال پاکستان ایس امتحان وچ سرخرو ہوئے گا۔