کابینہ اجلاس: دھمکی آمیز خط اُتے اِن کیمرہ سیشن وچ بحث کران دا فیصلہ

اسلام آباد(پنجابی میڈیا گروپ)وزیراعظم عمران خان دی زیر صدارت وفاقی کابینہ نے دھمکی آمیز خط دے معاملے اُتے اِن کیمرہ سیشن وچ بحث کران دا فیصلہ کیتااے۔ذرائع دے مطابق وزیراعظم دی زیر صدارت وفاقی کابینہ دے اجلاس دی اندرونی کہانی ساہمنے آگئی، اجلاس وچ فیصلہ کیتا گیا کہ سائفر میسج دا لب لباب اِن کیمرہ سیشن وچ پیش کیتا جائے گا۔کابینہ نے الیکشن کمیشن ولوں الیکشن 3مہینیدی بجائے7مہینے وچ کروان دی مذمت کردیاں ہویاں آکھیاکہ الیکشن کمیشن دی ذمہ داری اے کہ الیکشن 3مہینے وچ کروائے،ای سی پی اپنی آئینی ذمہ داری پوری کرن وچ نکام رہیا اے۔ ذرائع دے مطابق حکومتی لیگل ٹیم دے مشورے اُتے عدم اعتماد دی تحریک توں پہلاں اسمبلی دا اِن کیمرہ سیشن وچ بحث کروان دا فیصلہ کیتا گیا۔اجلاس وچ حکومتی لیگل ٹیم نے رائے دتی کہ سپریم کورٹ پارلیمنٹ دے آئینی اختیار گھٹ نہیں کر سکدی۔ایس توں پہلاں تحریک انصاف نے عوامی رابطہ مہم تیز کرن دا فیصلہ کر لیا،وزیراعظم عمران خان دی زیرصدارت سیاسی کمیٹی دے اجلاس وچ فیصلہ کیتا کہ عوام نوں حکومت دے خلاف سازش بارے اعتماد وچ لیا جائے۔وزیراعظم عمران خان دی زیر صدارت اجلاس وچ سیاسی صورتحال اُتے مشاورت کیتی گئی، اجلاس وچ ملک دے ساریاں ضلعیاں وچ جلسے کرن دا فیصلہ کیتا گیا۔ذرائع دے مطابق اجلاس وچ خط وچ مبینہ سازش نوں پبلک کرن یا نہ کرن بارے تجویز لئی گئی،ارکان نے خط دی سیکریسی تے عدالتی حکم دی روشنی وچ تجویز دتی۔وزیراعظم نے آکھیا کہ اپوزیشن دی بیرونی سازش دا آلہ کار بنن نوں بے نقاب کر چکے ہاں،اپوزیشن عوام وچ جان توں گھبرا گئی،اسیں عوام وچ سرخرو ہوئے ہاں،اوہناں داہر سطح اُتے مقابلہ کراں گے۔