عالمی سازش دے خلاف کمیشن تشکیل دے دتا اے:فواد چودھری

اسلام آباد( پنجابی میڈیا گروپ) وفاقی وزیر اطلاعات و نشریات فواد چودھری نے آکھیا اے کہ عالمی سازش دے خلاف کمیشن تشکیل دے دتا اے،لیفٹیننٹ جنرل(ر) طارق خان کمیشن دی سربراہی کرن گے،کمیشن تحقیقات کرے گا سازش کیتھوں ہوئی، تحریک عدم اعتماد اُتے ڈپٹی اسپیکر دی رولنگ بارے عدالتی فیصلے اُتے اسیں سپریم کورٹ وچ نظر ثانی لئی جاواں گے۔ اسلام آباد وچ میڈیا نال گل بات کردیاں ہویاں فواد چودھری دا کہنا سی کہ فواد سازش دے لوکل ہینڈلر کون سن کمیشن تحقیقات کرے گا،کابینہ نے الیکشن کمیشن دے7مہینیاں تون پہلاں الیکشن نہ کران اُتے شدید تحفظات دا اظہارکیتا،90دن دے اندر ہر حال وچ الیکشن ہونے چاہیدے نیں، ہرطرح دے حالات دا مقابلہ کرن لئی تیار ہاں۔اوہناں نے ہور آکھیا کہ ممبران اسمبلی دے ساہمنے عدم اعتماد دیاں شہادتاں رکھیاں جان گیاں، اگرعوام نے اپنی آزادی دی حفاظت نہ کیتی تے پاکستان دوبارہ غلامی وچ چلا جائے گا،امپورٹڈ،سلیکٹڈ حکومت ساڈے اُتے مسلط کیتی جائے گی،اسیں محکوم بن جاواں گے،ایہ عدم اعتماد بین الاقوامی سازش دے تحت لیائی گئی،رجیم چینج دی دھمکی موجود اے یا نہیں،تحقیقات کیتی جائے گی۔وفاقی وزیر نے سپریم کورٹ دے فیصلے اُتے گل کردیاں ہویاں آکھیا کہ کل دے فیصلے نال پارلیمنٹ دی بالادستی خطرے وچ پہ گئی،کابینہ نے وزیراعظم عمران خان اُتے اعتماد دا اظہار کیتا، سپریم کورٹ کول دستاویزاں نہیں فیر کِنج پتا لگیاکہ اسپیکر نے ذہن دا غلط استعمال کیتا،عمران خان وزیراعظم ہیں تے رہن گے،اسیں کدھرے نہیں جارہے۔اوہناں دا کہنا سی کہ سپریم کورٹ نے اجلاس وی آپئی ای سدھیا، پوری قوم عمران خان نال کھڑی اے،اگررولنگ صحیح یا غلط تے پھرمواد نوں ویکھنا چاہیدا سی،ساڈی قنونی ٹیم ریویو تے ہور آپشن نوں وی ویکھ رہی اے،سپریم کورٹ نے آکھیا منحرف اراکان ووٹ پا سکدے نیں،منحرف اراکان دے ووٹ پان والا تے کیس ای نہیں سی،پارلیمنٹ دی ہن سپرمیسی نہیں رہی،پارلیمنٹ دی سپرمیسی سپریم کورٹ ول شفٹ ہوگئی اے،ایہ اک اینج دا معاملہ اے کہ سپریم کورٹ نوں نظرثانی کرنی چاہیدی اے۔