غیر ملکی سازش دے کوئی ثبوت نہیں ملے، اعلامیہ قومی سلامتی کمیٹی

اسلام آباد( پنجابی میڈیاگروپ)وزیراعظم شہباز شریف دی زیر صدارت قومی سلامتی کمیٹی اجلاس دے اعلامیہ دے مطابق ایجنسیاں نے بریفنگ دتی کہ غیر ملکی سازش بارے کوئی ثبوت نہیں ملیا جدکہ قومی سلامتی کمیٹی نے پچھلے اعلامیے دی وی توثیق کر دِتی۔وزیراعظم شہباز شریف دی زیر صدارت ہون والے قومی سلامتی کمیٹی دے اجلاس دااعلامیہ جاری کردتا گیا اے، اعلامیہ دے مطابق اجلاس وچ چیئرمین جوائنٹ چیفس آف اسٹاف کمیٹی تے تیناں سروسز چیفس،دفاع، خارجہ، داخلہ، اطلاعات دے وزیراں نے رَلت کیتی۔اعلامیہ دے مطابق اجلاس وچ واشنگٹن نال پاکستانی سفارتخانے دے مراسلے داجائزہ لیا گیا،امریکہ وچ پاکستان دے سابق سفیر اسد مجید نے اجلاس وچ رَلت کیتی،اسد مجید نے اجلاس نوں ٹیلی گرام دے مواد تے پس منظر اُتے بریفنگ دتی ۔ اجلاس دے جاری کردہ اعلامیہ دے مطابق پچھلے قومی سلامتی کمیٹی اجلاس دے منٹس دی توثیق کیتی گئی،ٹیلی گرام وچ کسی سازش دے ثبوت نہیں ملے،سکیورٹی ایجنسیاں نے قومی سلامتی کمیٹی نوں سازش دے ثبوت نہ ملن توں آگاہ کر دتا،سکیورٹی ایجنسیاں دی معلومات دے مطابق کوئی بیرونی سازش نہیں ہوئی۔اعلامیہ دے مطابق واشنگٹن وچ پاکستانی سفارتخانے نوں ٹیلی گرام موصول ہویا،خفیہ اداریاں نے مراسلے دی تحقیقات کیتی،مرکزی سکیورٹی ایجنسی دے مطابق کوئی بین الاقوامی سازش نہیں ہوئی، دوران تحقیقات غیر ملکی سازش دے کوئی ثبوت نہیں ملے۔