باہروں مداخلت نہیں ہونی چاہیدی،سازش دیاں گلاں ڈرامہ نیں،رانا ثناء اللہ

اسلام آباد( پنجابی میڈیا گروپ) وفاقی وزیر داخلہ رانا ثنا اللہ نے آکھیا اے کہ بیرونی سازش دیاں گلاں محض ڈرامہ،سابق دور وچ نیب نوں مخالفاں لئی استعمال کیتا گیا،ناں ای سی ایل وچ پا کے کڈیاای نہیں جاندا سی،ہن حکومت ثبوت نہیں لیاندی تے120دِناں بعد نام فہرست توں کڈیاں جائے گا۔قومی سلامتی کمیٹی دے اجلاس توں بعد پریس کانفرنس کردیاں ہویاں وزیر داخلہ نے آکھیا کہ سابق وزیرداخلہ ونگوں روزانہ پریس کانفرنس نہیں کرسکدا،جدوں وی وزارت بارے کوئی فیصلہ ہوئے گا میڈیا نوںآگاہ کردا رہواں گا ، الزام ثابت نہ ہون اُتے120دن بعد ای سی ایل توں ناں کَڈ دتا جائے گا،بلاوجہ حکومت نوں اینہے دناں تک ناں لسٹ وچ رکھن دا حق نہیں اپڑدا،شیخ رشید سنے کوئی وی ہوئے جناں نوں120دناں توں ودھ ہوگئے ناں کڈیا جائے گا۔اوہناں نے آکھیا کہ عمران خان نوںاوہی سکیورٹی دتی گئی جیہڑی اعظم خان نے آکھی سی،عمران خان نوں فول پروف سکیورٹی،رینجرز،ایف سی،بلٹ پروف گڈی فراہم کیتی جارہی اے،سابق وزیراعظم نال سیاسی اختلافات اپنی جگہ اُتے نیں،اسیں قنون اینج دے بنائے نیں جس نال سبھ نوںفائدہ ہوئے گا،اسیں قنون کسی جماعت دے خلاف نہیں بنائے۔وزیر داخلہ نے آکھیا کہ قومی سلامتی کمیٹی دااجلاس ہویا اے،آخری میٹنگ دے منٹس، فیصلے ڈسکس ہوئے،اسد مجید وی رَلتی ہوئے، اسٹیٹ منٹ دس دی اے کہ سازش دے حوالے نال کوئی اینج دی چیز نہیں اے،سازش دا جیہڑا ڈرامہ رچایا گیا اینج کوئی چیز نہیں سی،بیرونی مداخلت نہیں ہونی چاہیدی،جدوں سفیر لوکاں نوں ملدا اے تے اوس دی اپنی اک اسسمنٹ ہندی اے،سازش دے غلط بیانیے نوں اوہناں نے آپئی تقویت دتی،سازش پہلی میٹنگ وچ تے نہ ہن پائی گئی،مداخلت اک ایسا لفظ اے کہ اوس دی اپنے طور اُتے اسسمنٹ کر سکدے ہاں۔