تحریک انصاف دا پورے ملک وچ الیکشن کمیشن دے دفتر باہر احتجاج

اسلام آباد/کراچی/لہور/پشور/جہلم(پنجابی میڈیا گروپ)پاکستان تحریک انصاف (پی ٹی آئی) دے ارکاناں پورے ملک دے مختلف شہراں وچ الیکشن کمیشن آف پاکستان(ای سی پی) دے دفتر باہر احتجاج تے چیف الیکشن کمشنر سکندر سلطان راجہ دے مبینہ جانبدارانہ رویے دی مذمت کردیاں ہویاں عہدے توں مستعفی ہون دا مطالبہ کیتا اے،الیکشن کمیشن دے دفتر دے باہر تحریک انصاف دے احتجاج وچ پی ٹی آئی دے اراکان صوبائی تے قومی اسمبلی وی موجود رہے۔مظاہرے توں پہلاں کراچی وچ ای سی پی آفس دے باہر پلس تعینات سی تے سیکیورٹی انتظاماں دے تحت3موبائل ویناں وی جائے وقوعہ اُتے موجود سن ایس حوالے نال پچھلے دناں الیکشن کمیشن نے سیکیورٹی لئی چیف سیکریٹری تے آئی جی سندھ نوں خط وی تحریر کیتا سی۔دریں اثنا پی ٹی آئی رہنما فواد چوہدری تے فرخ حبیب نے اسلام آباد وچ ای سی پی آفس جان والے رستے بند کرن تے کنٹینر لان اُتے حکومت نوں تنقیددا نشانہ بنایا۔فواد چوہدری نے اک ٹوئٹ وچ آکھیا کہ الیکشن کمیشن دے دفتر دے باہر پورے ملک وچ صرف ٹوکن احتجاج اے تے بیوقوف حکومت پورا ملک ای بند کر کے بیٹھ گئی اے۔اوہناں نے آکھیا کہ اسلام آباد کلومیٹرز وچ کنٹینر لا کے بند کر دتا گیا اے،ایہ بوکھلاہٹ دی علامت اے،جد اسیں باقاعدہ تحریک شروع کراں گے تے اینہاں دا کیہ بنے گا؟پی ٹی آئی رہنما فرخ حبیب نے آکھیا کہ پر امن احتجاج ساڈا جمہوری حق اے لیکن جس طریقہ نال کنٹینر لا کے رستے بند کیتے گے اوس نال لگدااے کہ موجودہ امپورٹڈ حکومت دیاں کانپیں ٹانگ رہیاں نیں۔