غیر ملکی سازش اُتے عدالتی کمیشن قائم کیتا جائے:صدردا چیف جسٹس وزیراعظم نوں خط

اسلام آباد(پنجابی میڈیا گروپ)صدر ڈاکٹر عارف علوی نے پاکستان تحریک انصاف(پی ٹی آئی)دے چیئرمین تے سابق وزیراعظم عمران خان دا غیر ملکی سازش بارے خط موجودہ وزیراعظم شہبازشریف تے چیف جسٹس جسٹس عمر عطابندیال نوں گھلدیاں ہویاںآکھیا کہ تحقیقات لئی بااختیار عدالتی کمیشن قائم کیتاجائے۔صدر عارف علوی نے سابق وزیر اعظم عمران خان دے خط دا جواب دے دِتا جس وچ صدر مملکت نے حکومت وچ تبدیلی لیان لئی مبینہ سازش دی تحقیقات اُتے زور دِتا اے۔جوابی خط وچ صدر نے آکھیا اے کہ حکومت وچ تبدیلی دی مبینہ سازش اُتے مکمل تحقیقات دی ضرورت اے،عوام نوں وضاحت دین،معاملے نوں منطقی انجام تک پہنچان لئی حالات اُتے مبنی شواہد ریکارڈ کرن دی ضرورت اے۔امریکا وچ پاکستان دے سابق سفیر ولوں گھلی گئی سائفر دی کاپی پڑھی،سائفر وچ امریکی انڈر سیکرٹری ڈونلڈ لو نال پاکستانی سفارت خانے وچ ہون والی ملاقات دی باضابطہ سمری موجود سی،سائفر رپورٹ وچ مسٹر لو دے بیان شامل نیں جناں وچ خاص طور اُتے وزیر اعظم دے خلاف عدم اعتماد دی تحریک دا ذکر کیتا گیا،سائفر وچ تحریک دی کامیابی دی صورت وچ معافی،نکامی دی صورت سنگین نتیجے دا وی ذکر اے۔اوہناں نے آکھیا کہ قومی سلامتی کمیٹی دے2اجلاساں وچ توثیق کیتی گئی کہ بیانات پاکستان دے اندرونی معاملیاں وچ ناقابل قبول تے صریح مداخلت دے مترادف اے،پاکستان نے بجا طور اُتے ڈی مارش جاری کیتا،دھمکیاں خفیہ تے ظاہردونوں ہوسکدیاں نیں لیکن غیر سفارتی زبان وچ واضح طور دھمکی دِتی گئی۔