دلکش آواز دا جادو…گلوکارہ مون پرویز

گلوکاری دی دنیا وچ مون پرویز دا ناں کوئی نواں نہیں اے۔ اوہ جدوں گا رہی ہون تے سماں رنگین ہو جاندا اے۔ سنن والے اوہناں دے گیتاں اتے جھوم جاندے نیں۔ گویا ایہہ آکھیا جا سکدا اے کہ مون پرویز دی آواز دا جادو سر چڑھ کے بولدا اے۔ اوہ جہڑی محفل وچ ہون مرکز نگاہ ہوندیاں نیں۔ اوہناں دی سریلی آواز نے سوشل میڈیا اتے وی اوہناں دے لکھاں مداح پیدا کیتے نیں۔ اوہناں دی آواز صرف پاکستان ای نہیں بلکہ بہت سارے ملکاں وچ اپنی صلاحیتاں دا لوہا منوا چکی اے۔ اوہناں نے بیسٹ سنگر دے بہت سارے ایوارڈز اپنے نام کر رکھے نیں۔ مون پرویز نوں ماڈلنگ دا وی جنون اے۔ اوہ یو کے دے میوزک میلہ وچ وی پرفارمنس دے چکیاں نیں۔ اوہناں نے اوتھے دے وڈے شہراں مانچسٹر تے برمنگھم دے شوز وچ وی پرفارم کیتا اے۔ ہن اوہ فیر یورپ دے ملکاں ڈنمارک’ پیرس’ اٹلی تے انگلینڈ دے نال دبئی وچ پرفارم کرن لئی جا رہیاں نیں۔ اوہناں دے نال گلوکار نعیم ہزاروی وی پرفارم کرن جا رہے نیں۔ مون پرویز یورپ وچ پرائیڈ آف پرفارمنس گلوکار عطا اللہ عیسیٰ خیلوی دے نال وی پرفارم کر چکیاں نیں۔ مون پرویز نے دسیا کہ اوہناں نے فوک دے بادشاہ گلوکار عطااللہ عیسیٰ خیلوی دے نال یورپ وچ پہلی واری پرفارم کیتا سی۔ اوس ویلے اوہناں نے یورپ دے مختلف شہراں برسلز’ کوپن ہیگن’ پیرس تے لندن وچ شوز کیتے جنہاں وچ اوہناں نوں بہت پذیرائی ملی۔ اوہناں نے آکھیا کہ ایہدے وچ کوئی شک نہیں کہ ساڈے ملک دے فنکاراں نے پاکستان توں باہر ملک دا نام روشن کیتا اے تے اوہناں نوں بڑی خوشی محسوس ہوندی اے۔ جدوں اوہناں دے ناں دے نال اوورسیز وچ اوہناں دے پاکستان دا ناں پکاریا جاندا اے۔
مون پرویز نے آکھیا کہ زندگی وچ پیار تے محبت لازمی اے۔ ایہدے بغیر زندگی بے معنی ہو جاندی اے۔ نفسا نفسی دے دور وچ لوک رشتیاں دے احترام نوں فراموش کردے جا رہے نیں۔ میرا ظاہرتے باطن اکو جیا اے۔ جہڑی گل دل وچ ہوندی اے اوہ بیان کرن توں گریز نہیں کردی جہدی وجہ نال بعض اوقات مینوں تنقید دا سامنا وی کرنا پیندا اے۔ گلوکارہ مون پرویز نے دسیا کہ میں ایس گل تے مکمل یقین رکھنی آں کہ انسان جو بوندا اے اوہو وڈدا اے۔ میں اپنی زندگی وچ جو وی دل
وچ آیا اوہنوں ٹارگٹ بنا کے محنت کیتی جہدی وجہ نال مینوں عزت و شہرت تے ایہہ مقام ملیا۔ اج دے دور وچ مخلص تے بے لوث افراد دا قحط اے جانے کیوں لوک رشتیاں نوں بھلاندے جا رہے نیں۔ مون پرویزنے دسیا کہ اوہ کجھ دناں تک دبئی وچ شوز لئی فیر جا رہیاں نیں۔ ایہدے مگروں یورپ ٹور تے جان گئیاں۔ اوہناں نے دسیا کہ پچھلے دناں اوہناں نے لہور پریس کلب دی تقریب وچ پرفارم کر کے جہڑی پذیرائی سمیٹی اوہ یادگار سی۔ اوہناں نے دسیا کہ اوہ اپنے نویں گیت نوں دبئی وچ ای شوٹ دا ارادہ کردیاں نیں۔ ایہدے مگروں سوشل میڈیا تے چینلاں توں ریلیز کرن گِیاں۔ اک سوال دے جواب وچ اوہناں نے آکھیا کہ پی ایس ایل سیزن سیون پاروں پاکستان وچ کرکٹ بحالی وچ مدد ملی اے تے ہن لوک پاکستان نوں پرامن قرار دیندے نیں تے بے دھڑک آسٹریلوی ٹیم وی آ گئی اے۔ ایس توں دنیا بھر وچ ساڈا مثبت امیج وی نمایاں ہویا اے۔ مون پرویز نے ہور آکھیا کہ اوہناں دے سوشل میڈیا فرینڈز نال رابطے رہندے نیں تے ایس وجہ نال اوہ پوری دنیا دے نامور سنگراں دے نال رابطے وچ رہندیاں نیں جہدی وجہ نال سوشل میڈیا نے وی اوہناں دی شہرت وچ نمایاں کردار ادا کیتا اے۔ تاہم ایہدے تے بلاوجہ تنقید کرن والے مینوں قطعی پسند نہیں ۔ سوشل میڈیا اتے تے بھیڑ چال چلدی اے جہڑاکسے نوں برا آکھ دیوے تے سارے برا آکھن لگ جاندے نیں۔ میں ویکھیا اے کہ اک بری شے نوں کوئی اک بے وقوفی نال چنگا آکھ دیوے تے لوکی اوہدی تعریفاں کرن لگدے نیں۔ میرا نواں گیت جدوں وی آندا اے تے سوشل میڈیا اتے ملینز دی تعداد وچ لوکی پسند کردے نیں جو بہت چنگا لگدا اے۔