ایمازون جم خانہ پاکستان دی سب توں وڈی کمپنی اے

موجودہ دور انفارمیشن ٹیکنالوجی دا اے۔ اوہو لوک تے ملک ترقی کرن گے جہڑے ویلے دی رفتار دے نال چلن دی صلاحیت رکھدے نیں۔ انٹرنیٹ تے سوشل میڈیا نے جتھے معاشریاں نوں بدل کے رکھ دتا اے اوتھے کاروبار کرن دے طریقے وی بدل چکے نیں۔ گرائونڈ اتے منڈیاں دا متبادل ہن آن لائن منڈیاں بن رہیاں نیں۔ ہر طرحاں دا کاروبار آن لائن ہو رہیا اے۔ ایہہ کیویں ہوندا اے تے ایہدے کیہ کیہ فیدے حاصل ہو سکدے نیں ایہہ جانن لئی اسیں پاکستان دے سب توں کامیاب ای کامرس دے ماہر مستنصر حیات چیمہ نال گل بات کیتی تے اوہناں کولوں پچھیا کہ کیویں ای کامرس ہی بہتر مستقبل دی ضمانت اے۔ اوہناں نال ہون والی گل بات ملاحظہ کرو۔
سوال:تسیں پیکنگ دا کم کردے سی’ فیر اچانک تبدیلی کیویں آئی’ اینے کامیاب کیویں ہوئے؟
جواب: ایہہ گل صحیح اے کہ میں شروع وچ پیکنگ مین دے طور تے کم شروع کیتا۔ اوہناں دناں میں برطانیہ وچ سی لیکن میری سوچ ہمیشہ توں ایہو سی کہ میں کجھ وَکھرا کراں۔ ایمازون دے نال پیکر دے طور تے کم کردے ہوئے میں آن لائن کاروبار دی جزیات نوں جانیا تے پرکھیا۔ میں ایہہ وی سوچدا سی کہ ایس کاروبار نوں ودھایا کیویں جا سکدا اے۔ ایہہ ساری سٹڈی میں اپنے طور تے کردا سی’ میرا کم ایہہ نہیں سی۔ میں یوکے دی مارکیٹاں اتے نظر رکھی۔ کیہ وِک رہیا اے تے مستقبل وچ کیہڑی چیز بوہتی ڈیمانڈ وچ جاوے گی۔ میں اوہدا بغور جائزہ لیا۔ تھیوری میری اپنی سی’ پریکٹیکل کم کمپنی وچ تھوڑا بہت کر رہیا سی۔ میں کمپنی نوں آفر دتی کہ میں ایمازون اتے تہاڈے لئی کم کرنا چاہنا واں۔ اوہناں نے حیرت دا اظہار کیتا کہ تہاڈے اتے کیویں بھروسہ کریے تے کیویں تہانوں کم کرن دئیے جد کہ تہاڈا کوئی تجربہ وی نہیں اے۔ میں اوہناں نوں نقصان دی ذمہ واری لین تے منافع دا حصہ دین دی شرط اتے راضی کر لیا۔
سوال: تسیں ”وڈا بول” بول کے اپنے آپ نوں پھسا لیا؟
جواب: بالکل نہیں۔ میں مارکیٹ دا چنگی طرح مطالعہ کر لیا سی۔ مینوں پتہ سی کہ مارکیٹ دا رجحان کہڑے پاسے جا رہیا اے۔ مینوں پتہ سی کہ میں جو کہہ رہیا واں اوہ میں کر کے وکھاواں گا تے اوہو ہویا میں کمپنی دی سیل اک ملین ڈالر ودھا دتی۔ اک ایسے فورم اتے جتھے اوہناں دا وجود ای نہیں سی۔ اوتھوں اوہناں نوں اینی سیل ملی تے اوہ خوش ہو گئے۔ اللہ نے میری عزت رکھی تے میرے اعتماد وچ وی وادھا ہویا۔
سوال:برطانیہ توں پاکستان شفٹ ہون دافیصلہ کیوں کیتا؟
جواب: برطانیہ وچ کم کرن دے اخراجات بہت زیادہ سن جہناں نوں گھٹ کرن لئی سوچ وچار کیتی گئی تے میں اندازہ لایا کہ پاکستان دے اندر سٹاف نوں بھرتی کر کے کم کرنا برطانیہ دی نسبت بہت گھٹ خرچ اے ایس لئی پاکستان وچ بیٹھ کے کم کرن دا فیصلہ کیتا۔
سوال:پاکستان وچ تسیں نوجواناں نوں اپنی جیب توں خرچ کر کے تربیت دتی’ایہہ کیہ معاملہ اے؟
جواب:برطانیہ توں میں بہت کجھ سکھیا تے پیسہ وی کمایا۔ اپنے تجربے دے نال جدوں میں اپنے ملک وچ واپس آیا تے میں چاہندا سی کہ ایتھے وی لوک ایس موقعے توں فیدے حاصل کرن۔ اپنے پنڈ دے لوکاں وچ خدمت کرن دا جذبہ شروع توں رکھدا سی۔ میں پنڈ وچ مہم چلائی کہ پیسے کمان دے موقعے توں فیدہ چکو۔ شروع وچ اوہناں نے میری گل اتے توجہ نہیں دتی مگر آہستہ آہستہ اوہناں نوں اندازہ ہویا کہ میں ٹھیک آکھ رہیا واں۔ میرے تربیت یافتہ منڈیاں نے لکھاں روپے کمانا شروع کر دتے تے فیر میرے کول لوکاں دی آمدورفت بوہتی ہو گئی۔
سوال:پنڈ والیاں نوں تہاڈے آئیڈیاز اتے یقین نہیں سی؟
جواب:پنڈاں وچ لوک ٹیکنالوجی نوں اپناندے ہوئے ہچکچاندے نیں۔ اوہ نوکری تے ہتھ نال کیتی گئی مزدوری دے علاوہ کسے ڈیوائس دے استعمال نال پیسے کمان نوں سمجھن توں قاصر سن ایس لئی اوہناں نوں لگدا سی کہ میں کیہ گل کر رہیا واں مگر جدوں اوہناں دے اپنے بالاں نے لکھاں روپے کمائے تے فیر اوہناں نوں سمجھ آ گئی۔ اوہناں دا یقین نہ کرنا فطری گل سی۔
سوال:آن لائن کم کر کے منافع ہووے گا’ ایہدی کیہ گارنٹی اے؟
جواب:گارنٹی اوہو دے سکدا اے جہنوں کم دی مکمل سمجھ ہووے۔ منافع دا تعلق دو چیزاں نال اے۔ اک ایہہ کہ جدوں تسیں پراڈکٹ خریدو تے اوہدی کاسٹ گھٹ ہووے تاں جے تہانوں منافع بوہتا ہووے۔ برطانیہ وچ چیزاں مہنگیاں سن۔ تسیں مہنگی چیزاں خرید کے ویچو گے تے منافع اتے اثر پووے گا۔ منافع گھٹ ہو جاوے گا۔ دوجی چیز ایہہ ہوندی اے کہ تہاڈی کمپنی چلان دی جہڑی کاسٹ اے اوہ گھٹ توں گھٹ ہووے۔ ایہناں دو فیکٹراں اتے کم کیتا جاوے تے بوہتا منافع کمایا جا سکدا اے۔
سوال:پراڈکٹ نوں گھٹ قیمت اتے کیویں خریدیا جا سکدا اے۔ ایس حوالے نال تہاڈا تجربہ کیسا اے؟
جواب: جدوں میں ایہدے اتے کم شروع کیتا تے ایہدے لئی میں چین دا رخ کیتا۔ ایس مقصد لئی میرے چین دے قریباً دس دورے نیں کہ جہناں دے دوران میں پراڈکٹ ریسرچ تے قیمت اتے کم کیتا۔ فیر میں اپنی پراڈکٹ دے ٹارگٹ اتے کم کیتا کہ کتھے کتھے میں اپنی پراڈکٹ نوں ویچ سکنا واں۔ خریداری توں ویچن تک دے مرحلیاں وچ سمارٹ کھیڈن نال منافع گھٹ یا بوہتا ہو سکدا اے۔
سوال:ایمازون کیہ اے تے ایہدے اتے چنگی سیل دا فارمولا کیہ اے؟
جواب: ایمازون اک ریٹیل ویب سائٹ اے جہدے اتے اپنی اپنی پراڈکٹس لوک سیل کر رہے نیں۔ ایہہ انج ای اے کہ جیویں معاشرے وچ کوئی وی دکاندار یا تاجر اپنا مال ویچدا اے۔ اوسے طرح آن لائن تسی اپنی دکان بنا لیندے او۔ اوہدے تے گاہک نوں متوجہ کردے او۔ اوہناں نوں دسدے او کہ جو اوہناں نوں چاہیدا اے اوہ تہاڈے کول اے۔ تہاڈا گاہک پوری دنیا وچ اے۔ پوری دنیا توں لوک تہاڈے نال رابطہ کردے نیں تے تسیں اوہناں دی لوڑ پوری کردے او۔ ایمازون دے ذریعے ادائیگی ہوندی اے تے پیسے تہاڈے تک پہنچ جاندے نیں۔
ایمازون اتے چنگی سیل لئی ضروری اے کہ تسیں اپنی کیٹلاگ اتے کم کرو۔ ایہدے وچ لوڑ دے مطابق تبدیلیاں کرو۔ کسٹمرز دی ڈیمانڈ کیہ اے اوہدے اتے نظر رکھو۔ اوس ڈیمانڈ نوں پورا کرن لئی زور لائو۔ کسٹمرز نوں دسو کہ اوہناں دے مسئلیاں دا حل تہاڈے کول اے کیوں جے سیل اوسے چیز دی بوہتی ہوندی اے جہڑی گاہک دی لوڑ دے عین مطابق ہووے۔ اک واری تسیں اوہ چیز دینا شروع کردتی تے گاہک تہاڈے کول ودھنا شروع ہو جان گے۔
سوال:ایمازون اتے کم کرن دا تہاڈا تجربہ کیسا اے؟
جواب:اسیں دنیا بھر وچ قریباً ست لکھ 50ہزار توں ودھ مصنوعات ویچنے آں۔ ایمازون جم خانہ پاکستان دی سب توں وڈی کمپنی اے جہدی سیل سب توں ودھ اے۔ ایمازون جمخانہ دے نال جے تسیں کم کرو تے اسیں تہاڈے نقصان دی وی ذمہ واری لینے آں۔ اوہدوں تک منافع نہیں لیندے جدوں تک جہڑی کمپنی نے ساڈی خدمات لیتیاں نیں اوہنوں منافع نہ ہووے تے اوہدی سیلز وچ وادھا نہ ہووے۔ ایہہ گارنٹی کوئی ہور نہیں دیندا۔
سوال:صدر پاکستان نے تہانوں ہیروز آف گوجرانوالہ دا خطاب دتا تے کیسا لگیا؟
جواب:ساڈی کمپنی لئی ایہہ اک اعزاز
دی گل اے کیوں جے ساڈی کمپنی ایمازون جم خانہ دا ہیڈ آفس گوجرانوالہ وچ اے۔ اوتھے اسیں بے روزگاری دے خاتمہ لئی اقدامات کیتے۔ سولہ سو توں ودھ نوجواناں نوں روزگار دتا۔ ایسے وجہ نال صدر پاکستان نے سانوں ہیروز آف گوجرانوالہ دا خطاب دتا جہڑا ساری عمر لئی ساڈے لئی اعزاز اے۔ پیسے کمانا زندگی دا حصہ اے جہڑا وی کاروبار تسیں کرو ‘ پیسے تسیں بنا لیندے او لیکن معاشرے وچ باعزت نام بنانا’ ایہہ میرے نزدیک بہت اہم اے تے ایہو وجہ اے کہ میں یوکے توں واپس آ کے پاکستان وچ کم شروع کیتا تے اپنے پنڈ والیاں نوں خاص طور تے نال لے کے چلیا۔ اپنی جیب توں اخراجات کیتے تے نقصان دی پرواہ نہیں کیتی۔ اللہ دا شکر اے کہ میں اپنی زندگی توں مطمئن آں۔