عمران خان لانگ مارچ حکومت نہیں،اسٹیبلشمنٹ دے خلاف کر رہیااے:مریم نواز

لہور(پنجابی میڈیاگروپ)پاکستان مسلم لیگ ن دی نائب صدر مریم نواز نے آکھیا اے کہ ملک بچان لئی ساریاںاداریاں نوں اک پیج اُتے ہوناچاہیدا اے،عدالتاں نوں وِی ادب دے نال کہنا چاہندی ہاں اینج دی روایت نہ پاون،اینج نہ کرن جیہڑا شخص سب توں وَدھ کے اداریاں نوں گالیاں کَڈن اوسی دے حق وِچ فیصلے ہون،عمران خان لانگ مارچ حکومت دے خلاف نہیں،اسٹیبلشمنٹ دے خلاف کر رہیا اے۔پاکستان تحریک انصاف(پی ٹی آئی)دے لانگ مارچ دے حوالے نال نیوز کانفرنس توں بعد پاکستان مسلم لیگ ن دی نائب صدر دا کہنا سی کہ پلس کانسٹیبل نوں دوران ڈیوٹی شہید کیتا گیا،اج جیہڑاکانسٹیبل شہید ہویا ایس داذمہ دارعمران خان اے،پی ٹی آئی ممبر نے پلس اہلکار نوں فائرنگ کر کے شہید کیتا،اوہناں دے کول آنسو گیس دے شیل،اسلحہ تے ڈنڈے نیں،کانسٹیبل نوں شہید کرن نال اوہناں دے ارادے کُھل کے قوم دے ساہمنے آگئے۔اوہناں نے اکھیا کہ حکومت توں کَڈے جان اُتے عمران خان نوں صدمہ اپڑیا۔آکھیا گیا میرے قتل دی سازش ہو رہی اے،تہاڈے اپنے بالاں نوں لندن وِچ بٹھایا اے تے قوم دے بالاں نوں مروانا چاہندے نیں،تُسی قوم دے بالاں نوں سڑکاں اُتے لیا کے مار پڑوانا چاہندے نیں،شہید ہون والا کانسٹیبل قوم دا پُتر سی،تُسی اپنے بالاں نوں آکھو کہ ایس مظاہرے نوں لیڈ کرن،اپنے بالاں نوں آکھو برطانوی پاسپورٹ چھڈ کے پاکستان آن۔ایس ملک نوں سری لنکا بنان دی کوشش کامیاب نہیں ہوئے گی۔مریم نواز نے آکھیا کہ میں اپنی ہر تحریک وِچ فرنٹ لائن اُتے ہُندی سی،پہلاں تُسی آکھیا کہ نیوٹرل جانور ہُندااے،کل تُسی ادارے نوں آکھیا کہ نیوٹرل رہین،عمران خان لانگ مارچ حکومت دے خلاف نہیں،اسٹیبلشمنٹ دے خلاف کر رہیا اے،جَد مریم تے نواز شریف نوں سزاہوئی تے تُسی عدالتاں آزاد نیں،جَد آئین دی بالادستی لئی عدالت رات نوں کھلی تے تُسی عدلیہ نوں بُرا بِھلاآکھیا،چیف الیکشن کمشنر نوں تُسی آپئی لایا،ہُن تُسی چیف الیکشن کمشنر نوں بُرا بھلا کہہ رہے او۔اوہناں نے آکھیا کہ عدالتاں نوں وِی ادب نال کہنا چاہندی ہاں اینج دی روایت نہ پائے،اینج نہ کرن جیہٹرا شخص سبھ توں وَدھ کے اداریاں نوں گالیاں کڈن اوس دے حق وِچ فیصلے ہون،کہندے نیں کہ حمزہ شہباز وزیراعلی نہیں،کیا عثمان بزدار وزیراعلی اے؟پنجاب کیہ گَل مُفت داآیا ہویا اے، پہلاں پنجاب نوں بزدار ذریعے خراب کیتا فیر کسی ہور دے ذریعے لُٹیا،مال بھر بھر کے بیگ وی بنی گالہ وِچ بیٹھی محترمہ نوں جاندا رہیا،پنجاب وِچ جلسیاں لئی جا رہی سَاں اینج لگیا کہ کھنڈر وِچ جا رہی ہاں،پنجاب دی عوام نے اپنا مینڈیٹ اوہناں توں کھو کے نواز شریف دے حوالے کیتا،پنجاب دے وزیراعلی حمزہ شہباز نیں ایس نوں جنا وی روک لوو اوہی وزیراعلی رہے گا،پاکستان دے وزیراعظم شہباز شریف نیں تے اوہی رہن گے،ہُن فیصلے تہاڈی نہیں حکومت دی مرضی نال ہون گے،تُسی پارلیمنٹ اُتے حملہ کیتا،وزیراعظم ہائوس دے دروازے اُتے اپڑے، تُسی گندے کپڑے دھو کے سپریم کورٹ دے باہر پائے،عمران خان ملک وِچ فساد برپا کرنا چاہندا اے ایہ اسیں نہیں ہون دیاں گے۔لیگی نائب صدر نے آکھیا کہ تہاڈے2014دھرنے پاروں چینی صدر پاکستان نہیں آ سکے سَن،عمران خان لانگ مارچ دااعلان کر کے پَھس گئے،عمران خان دھمکی ساہنوں نہیں اسٹیبلشمنٹ نوں دیندے نیں،4وَرھیاں وِچ اوس نے ملک نوں تباہ کر دِتا،اسیں تے2018وِچ لوڈشیڈنگ ختم کر گئے سَاں،اج ایس پاروں ملک وِچ لوڈ شیڈنگ ہو رہی اے،عمران خان نے ساری توجہ انتقام اُتے رکھی،عمران خان اکیلے22کروڑ عوام دی تباہی دے ذمہ دار نیں اوسے دا ناں لینا پئے گا،17ورھے یا70ورھے عمر ہو جائے انسان دی خصلت نہیں بَدل دی۔