خونی مارچ، فساد تے فتنے دا اعلان ڈَنکے دِی چوٹ اُتے کیتاجارہیااے،مریم اورنگزیب

اسلام آباد(پنجابی میڈیاگروپ)وفاقی وزیر اطلاعات تے نشریات مریم اورنگزیب نے پاکستان تحریک انصاف دے اسلام آباد وَلوں لانگ مارچ دے اعلان اُتے آکھیا اے کہ خونی مارچ،فساد تے فِتنے دااعلان ڈَنکے دِی چوٹ اُتے کیتاجا رہیا اے،ریاست دِی رِٹ اُتے کوئی سمجھوتا نہیں ہوئے گا تے شہریاں،تاجر،اسکولاں دے بالاں تے سارے شہریاں دی حفاظت حکومت تے ریاست دی ذمہ داری تے فرض اے،جس نوں مکمل طور اُتے نبھایا جائے گا تے کوئی خلل نہیں آئے گا،پلس اہلکار دی شہادت اُتے مذمت تک نہیں کیتی گئی،کیا ایہ مارچ اپنی چوری دے خلاف اے؟انٹیلی جنس رپورٹ اے ایہ مسلح لوگ نیں۔منگل نوں وفاقی کابینہ دے اجلاس توں بعد پریس کانفرنس کردیاں ہویاں وزیراطلاعات و نشریات مریم اورنگزیب نے آکھیاکہ اک فسادی تے فتنہ ٹولہ ڈرامے بازی اُتے اُتر آیا اے،اوہناں دا کم ہی ایہ اے،اقتدار اُتے رہ کے جھوٹ بولو تے کنٹینر اُتے چڑھ کے ڈرامے بازی کرو تے فیر جھوٹ بولو۔اوہناں نے آکھیا کہ جَدوں تَک لانگ مارچ دااعلان ہویااے،ایس وِچ خونی مارچ، فساد تے فتنے دااعلان ڈَنکے دِی چوٹ اُتے کیتاجارہیااے۔