عمران نیازی نے دوست ملکاں نال تعلقات خراب کیتے:احسن اقبال

نیویارک( پنجابی میڈیاگروپ)وفاقی وزیر احسن اقبال نے آکھیااے کہ چین امریکا سنے دوست ملکاں نال تعلقات عمران خان نے خراب کیتے، پاکستان نوں سری لنکا بنان وچ کوئی کسر نہیں چھڈی۔تفصیل دے مطابق مسلم لیگ دے رہنما تے وفاقی وزیر پلاںنگ احسن اقبال نال امریکہ وچ مسلم لیگی عہدیداراں نے ملاقات کیتی۔وفاقی وزیر احسن اقبال دا کہنا اے کہ چین امریکہ یورپی یونین تے خلیجی ملک ساڈے دوست ملک نیں عمران خان نے اینہاں ساریاں نال تعلقات خراب کیتے نیں،عمران خان حکومت پاروں اینہاں ملکاں نال سرد مہری پیدا ہوئی اے۔اوہناں نے آکھیا کہ خلیجی ملکاں دے تحفے ویچ کے اوہناں دی بے توقییری کیتی اے،امریکہ یونیورسیٹیاں وچ طالب علماں نوںگھلیا جائے گا، آئی ایم ایف دیاں تقریبا ساریاں شرطاں مَن لیاں گیا نیں، ہُن آئی ایم ایف بلاوجہ لیٹ کررہیا اے،اک ہور کَڑی شرط اے جس نال ساڈے لئی مسائل پیدا ہوسکدے نیں۔احسن اقبال نے آکھیا اے کہ آئی ایم ایف تے پاکستان وچ اعتماددا فقدان اے جیہڑا عمران خان پاروں پیدا ہویا جناں نے آئی ایم ایف نال جھوٹ بولے، عمران خان نے پاکستان نوں سری لنکا بنان وی کوئی کسر نہیں چھڈی،اسیں حالات بہتر کیتے نیں تے پاکستان نوں سری لنکا بنن توں بچایا۔وفاقی وزیر دا ہور کہنا سی کہ الیکشن اگلے ورھے اکتوبر وچ نویں مردم شماری دے نال ہون گے،اوورسیز پاکستانیاں لئی پارلمینٹ وچ نشتاں رکھاں گے، انٹر نیٹ ووٹنگ نال دھاندلی دے بوہت امکانات نیں۔