ارشد محمود ایئر فورس چھڈ کے مستقل پی آئی اے وچ آ جان: سپریم کورٹ

اسلام آباد: سپریم کورٹ نے آکھیا اے چار جہاز چلے گئے پی آئی اے انتظامیہ نوں خبر تک نہیں، ارشد محمود ملک ایئر فورس چھڈ کے مستقل پی آئی اے وچ آ جان، سابق وزیراعظم اپنے علاج لئی جہاز لندن لے کے گئے تے جہاز اوہناں دے علاوج تک لندن وچ کھڑا رہیا، اسیں جانا ہووے تے جہاز ملدا اے نہ ٹکٹ۔

پی آئی اے خسارہ کیس وچ عدالت نوں دسیا گیا جہاز مالٹا وچ فلم دی شوٹنگ لئی استعمال ہویا تے جرمنی گیا۔ شوٹنگ دی مد وچ ادارے نوں 2لکھ 10ہزار یورو ملے۔

چیف جسٹس نے ریمارکس دتے فیصلہ ہویا سی کہ جہاز کمرشل مقاصد لئی استعمال نہیں ہووے گا، فلم بنان والی کمپنی اسرائیلی سی، ایہ بہت سنجیدہ گل اے جہڑے پیسیاں وچ جہاز ویچیا گیا ایہدے توں دس گنا ودھ اخراجات ادا کیتے گئے۔

چیف جسٹس آکھیا رپورٹ وچ تن ہور جہازاں دا وی ذکر اے، ایہ تن جہاز کتھے گئے کسے نوں کوئی پتہ نہیں، کیہ باقی تن جہاز کھول کے کباڑ خانے وچ تے نہیں دے دتے، کھلی عدالت وچ ہور کجھ نہیں کہنا چاہندا، پی آئی اے والے صرف کاغذی کاروائی کرکے آئے نیں۔وکیل پی آئی اے نے دسیا تن جہازاں بارے وی رپورٹ جمع کراواں گے۔

چیف جسٹس نے ریمارکس دتے چار جہاز چلے گئے پی آئی اے انتظامیہ نوں خبر تک نہیں، اک کم ہووے گا، ارشد ملک پی آئی اے وچ کم کرن یاں ایئر فورس وچ ، ارباں روپے دا نقصان ہو رہیا اے۔

حکومت نوں پی آئی اے دی فکر نہیں، عدالت نے ہور سماعت مارچ دے پہلے ہفتے تک ملتوی کر دتی۔