کوشش اے پاکستان نوں فلاحی ریاست بنایئے: وزیراعظم عمران خان
لیہ: وزیراعظم آکھیا اے پاکستان دا نظریہ تہاڈے ساہمنے رکھنا چاہنا آں،کوشش اے پاکستان نوں فلاحی ریاست بنایئے، امیر تے غریب وچ فاصلہ ودھدا رہیا۔ احساس اثاثہ جات منتقلی پروگرام دی تقریب نال وزیراعظم عمران خان نے خطاب کردیاں آکھیا امیر تے غریب وچ فاصلے نال کوئی معاشرہ اگے نہیں ودھ سکدا، ریاست مدینہ دنیا دی پہلی فلاحی ریاست سی، پاکستان نوں فلاحی ریاست بنان لئی کوشاں آں۔
اوہناں آکھیا ہر مہینے 80ہزار لوکاں نوں بغیر سود قرض دتا جاوے گا، ہر ورھے 50ہزار سکالر شپس دتے جان گے، ملک بھر وچ پناہ گاہ بنان جا رہے آں، ہن تک 180پناہ گاہواں بن چکیاںنیں۔و زیراعظم دا کہنا سی کوشش اے کسے جگہ کوئی سڑک تے نہ سوئے، انصاف لئی غریب لوکاں نوں وکیل مہیا کراں گے، پنجاب وچ 60لکھ خانداناں نوں ہیلتھ کارڈز دیواں گے، 50لکھ خانداناں نوں ہیلتھ کارڈز دے چکے آں۔ اوہناں آکھیا ہسپتال دی مشینری درآمد کرن تے ٹیکس ختم کر دتا، سکول تے تعلیمی نظام وچ بہتری لیان دی کوشش کر رہے آں، چاہنے آں ملک وچ تعلیم دا اک نصاب ہووے، ملک وچ تعلیم دا نظام ٹھیک کرن لگے آں۔
عمران خان نے ہور آکھیا اساتذہ دی غیر حاضری تے سزا تے جزا دا نظام لیا رہے آں، تھانہ تے کچہری لوکاں لئی سب توں وڈا مسئلہ اے، عام بندے نوں تحفظ نہیں ملدا، نویں آئی جی پنجاب نوں سب دے ساہمنے مبارک دینا چاہنا آں، آئی جی نوں آکھیا وڈے وڈے بدمعاشاں نوں پھڑو۔
