پختونخوا اسمبلی دا اجلاس فیر ہنگامہ آرائی دی نذر، اپوزیشن دا احتجاج

پشاور: خیبر پختونخوا اسمبلی دا اجلاس اک واری فیر ہنگامہ آرائی دی نذر ہو گیا، اپوزیشن اراکین نے سپیکر ڈائس دے ساہمنے احتجاج کیتا، حکومتی تے اپوزیشن اراکین نے اک دوجے دے خلاف نعرے وی لائے۔ خیبر پختونخوا اسمبلی اجلاس سپیکر مشتاق غنی دی صدارت وچ شروع ہون توں پہلاں ای اپوزیشن اراکین اپنی نشستاں تے کھڑے ہو گئے تے ڈیسک وجانا شروع کر دتا۔

اپوزیشن اراکین نے سپیکر ڈائس دا گھیراؤ کیتا تے نعرے بازی کیتی، ایس دوران حکومتی اراکین نے اپوزیشن اراکین دے نعریاں دے جواب وچ نعرے لائے۔ احتجاج پاروں وقفہ سوالات وچ اپوزیشن دے سوالات لیپس کر دتے گئے۔

معاون خصوصی بلدیات کامران بنگش نے اپوزیشن دے احتجاج دے دوران کاغان ڈویلپمنٹ اتھارٹی بل 2020پیش کیتا، نیشنل ڈیزاسٹر مینجمنٹ ترمیمی بل وی ایوان وچ پیش کیتا گیا جد کہ حصول اراضی بارے بل منظور کر لیا گیا۔ سپیکر دا اپوزیشن اراکین نوں کہنا سی تسیں عوامی نمائندے او اپنی سیٹاں تے تشریف رکھو، پر اپوزیشن نے احتجاج جاری رکھیا، جہدے بعد سپیکر مشتاق غنی نے اسمبلی دا اجلاس پیر دے دیہاڑے 2وجے تک ملتوی کر دتا۔