سوشل میڈیا بارے مجوزہ حکومتی قوانین اسلام آباد ہائیکورٹ وچ چیلنج

اسلام آباد: ہائی کورٹ وچ سوشل میڈیا بارے مجوزہ حکومتی قوانین دے خلاف درخواست دائر کیتی گئی اے جہدے وچ سیکرٹری قنون و انصاف، سیکرٹری انفارمیشن ٹیکنالوجی چیئرمین پی ٹی اے نوں فریق بنایا گیا اے۔

درخواست وچ استدعا کیتی گئی اے سوشل میڈیا قوانین 2020نوں خلاف آئین قرار دے کے کالعدم قرار دتی جاوے تے حکومت نوں فوری طور تے سوشل میڈیا قوانین تے عملدرآمد کرن توں روکیا جاوے، سوشل میڈیا بارے مجوزہ حکومتی رولز شہریاں دے آئینی بنیادی حقوق توں متصادم نیں۔ درخواست وچ ہور آکھیا گیا اے آئین پاکستان آزادی اظہار رائے دا ضامن اے، مجوزہ قوانین آرٹیکل 19دی خلاف ورزی نیں، 20کروڑ عوام دی نمائندہ اسمبلی دی رائے لئے بغیر سوشل میڈیا قوانین متعارف کرائے گئے، سول سوسائٹی تے متعلقہ سوشل میڈیا کمپنیاں توں وی رائے نہیں لئی گئی جد کہ ٹوئٹر، فیس بک سنے دوجے سوشل میڈیا سائٹس موجودہ دور دی اہم لوڑ نیں۔