پیراگون ریفرنس، خواجہ برادران دے جوڈیشل ریمانڈ وچ 14دیہاڑ دا وادھا

لہور: احتساب عدالت نے پیراگون ریفرنس وچ نامزد خواجہ برادران دے جوڈیشل ریمانڈ وچ 14دیہاڑ دا وادھا کر دتا، لیگی رہنما رانا مشہود نے آٹا چینی بحران دے ذمہ داراں دی گرفتاری دا مطالبہ کر دتا۔ احتساب عدالت دے ڈیوٹی جج امیر خان نے خواجہ برادران دے خلاف پیراگون ریفرنس دی سنوائی کیتی، خواجہ برادران دے خلاف وعدہ معاف گواہ بنن والے قیصر امین بٹ بیماری دی وجہ توں ایمبولینس وچ پیش ہوئے تے اپنی حاضری مکمل کرائی۔

سابق صوبائی وزیر صحت خواجہ سلمان رفیق نوں جیل حکام نے عدالت دے ساہمنے پیش کیتا جد کہ عدالتی استفسار تے جیل حکام نے عدالت نوں آگاہ کیتا خواجہ سعد رفیق اسلام آباد وچ سٹینڈنگ کمیٹی دے اجلاس وچ مصروف نیں جہدی وجہ توں اوہناں نوں عدالت پیش نہیں کیتا جا سکیا۔

عدالتی کاروائی دے بعد میڈیا نال گل کردیاں لیگی رہنما رانا مشہود نے دعویٰ کیتا کہ موجودہ حالات وچ عوام فیر نوازشریف ول ویکھ رہی اے، خواجہ برادران دی پیشی دے موقع تے سکیورٹی دے کڑے انتظامات کیتے گئے سن جد کہ پلس اہلکاراں تے لیگی رہنماواں وچکار دھکم پیل وی ہوئی۔