خطے وچ امن دی کنجی کشمیریاں دی امنگاں موجب مسئلہ کشمیر دا حل اے: گورنر پنجاب
لہور: گورنر پنجاب چودھری سرور آکھیا اے خطے وچ امن دی کنجی کشمیریاں دی امنگاں دے مطابق مسئلہ کشمیر دا حال اے، کشمیریاں دے سفیر عمران خان نے ای مسئلہ کشمیر نوں سرد خانے توں کڈھیا اے۔ گورنر ہاؤس وچ ملتان بار تے کشمیری وفد نال ملاقات وچ گورنر پنجاب چودھری سرور دا کہنا سی سلامتی کونسل سنے پوری دنیا وچ امن پسند لوک کشمیریاں دی گل کررہے نیں، توقع اے صدر ٹرمپ وی نریندر مودی نال کشمیر تے ضرور گل کرن گے۔
گورنر پنجاب آکھیا یورپی یونین تے برطانوی پارلیمنٹ وچ وی مسئلہ کشمیر تے بحث ہو رہی اے۔ بین الاقوامی میڈیا وی کشمیر وچ بھارتی دہشت گردی نوں دنیا دے ساہمنے لیا رہیا اے، کشمیریاں تے بھارتی مسلماناں دے حقوق لئی پاکستان سفارتی محاذ تے جنگ لڑ رہیا اے۔ چودھری سرور آکھیا سرکار آئین و قنون دی حکمرانی تے شفافیت تے یقین رکھدی اے، قنون دی بالادستی لئی وکیلاں دا ہمیشہ مثالی کردار رہیا اے، سرکاری فوری تے سستے انصاف لئی اپنی ذمہ داری پوری کرے گی، ویلے سر تے فوری انصاف نال ای ظلم تے ناانصافی دا خاتمہ ممکن اے۔
