پنجاب کابینہ نے نوازشریف دی ضمانت وچ وادھے دی عرضی رد کر دتی

لہور: پنجاب کابینہ نے نوازشریف دی ضمانت تے وادھے دی اجازت دین توں انکار کر دتا۔ سابق وزیراعظم مطلوبہ میڈیکل رپورٹاں بورڈ تے کمیٹی نوں پیش نہ کر سکے۔ وزیراعلیٰ پنجاب سردار عثمان بزدار دی زیر صدارت اجلاس ہویا جہدے وچ نوازشریف دی ضمانت وچ وادھے سنے 5نکاتی ایجنڈے تے غور کیتا گیا۔ سابق وزیراعظم نوازشریف دی ضمانت وچ وادھے لئی خصوصی کمیٹی نے سفارشات پیش کیتیاں، نوازشریف مطلوبہ رپورٹاں بورڈ تے کمیٹی نوں پیش نہ کر سکے۔

پنجاب کابینہ نوں بریفنگ دتی گئی کہ صوبائی وزیراں راجہ بشارت تے ڈاکٹر یاسمین راشد دی سربراہی وچ 11 فروری نوں خصوصی کمیٹی تشکیل دتی۔ 19، 20تے 21فروری نوں کمیٹی دے یکے بعد دیگرے تن اجلاس ہوئے۔ 21فروری نوں مسلم لیگ (ن) دے رہنما عطا ء اللہ تارڑ پیش ہوئے تے ڈاکٹر عدنان سکائپ تے شریک ہوئے۔

نوازشریف دے نمائندیاں نے نویں تصدیق شدہ رپورٹاں دے بجائے پرانی رپورٹاں نوں حتمی قرار دین تے اصرار کیتا، میڈیکل بورڈ تے خصوصی کمیٹی ولوں کئی واری یاد دہانی دے باوجود مطلوبہ رپورٹاں فراہم نہیں کیتی گئیاں۔ خصوصی کمیٹی دی رپورٹ پنجاب کابینہ دے اجلاس وچ پیش کیتی گئی، پنجاب کابینہ نے نوازشریف دی درخواست ضمانت وچ وادھے نوں اتفاق رائے نال رد کردتا۔