مریم دا ناں ای سی ایل توں کڈھن دا معاملہ، ہائیکورٹ نے اٹارنی جنرل نوں طلب کر لیا
لہور ہائیکورٹ نے مسلم لیگ (ن) دی نائب صدر مریم نواز دا ناں ایگزٹ کنٹرول لسٹ (ای سی ایل) توں کڈھن تے پاسپورٹ واپسی دی درخواستاں تے اٹارنی جنرل پاکستان نوں طلب کر لیا۔ لہور ہائی کورٹ دے جسٹس علی باقر نجفی دی سربراہی وچ 2رکنی بنچ نے مریم نواز دی درخواستاں تے سماعت کیتی۔ مریم نواز ولوں امجد پرویز تے اعظم نذیر تارڑ ایڈوکیٹ پیش ہوئے جد کہ قومی احتساب بیورو (نیب) ولوں سپیشل پراسیکیوٹر سید فیصل رضا بخاری عدالت پیش ہوئے۔
سماعت دے موقع تے ایڈیشنل اٹارنی جنرل اشتیاق احمد خان وی عدالت وچ پیش ہوئے۔ دوران سماعت جسٹس علی باقر نجفی نے ریمارکس دتے اسیں چاہنے آں مریم نواز دے پاسپورٹ واپسی دے معاملے تے اٹارنی جنرل ساڈی معاونت کرن۔ایڈیشنل اٹارنی جنرل نے دسیا پنجاب حکومت نے نوازشریف دی 8ہفتیاں دی توسیع دی درخواست رد کر دتی اے جہدے بعد ایہ درخواست وی غیر موثر ہو جاوے گی۔ بعدوں عدالت نے مریم نواز دی درخواستاں تے کاروائی اک ہفتے لئی ملتوی کر دتی۔
