حکومت ہور چلی تے پاکستان نوں ناقابل تلافی نقصان ہووے گا: قمر زمان کائرہ

پاکستان پیپلزپارٹی وسطی پنجاب دے صدر قمر زمان کائرہ دا کہنا اے نویں الیکشن تے ان ہاؤس تبدیلی دا مطالبہ آئینی اے، حکومت ہور چلی تے پاکستان نوں ناقابل تلافی نقصان ہووے گا۔ لہور وچ پریس کانفرنس کانفرنس کردیاں قمر زمان کائرہ دا کہنا سی اوہ مسلم لیگ (ن) دے قائد تے سابق وزیراعظم نوازشریف دی صحت لئی دعا گو نیں، اوہ علاج لئی برطانیہ گئے نیں، اوہناں نوں علاج دی سہولت ملنی چاہیدی اے۔

قمر زمان کائرہ دا کہنا سی وزیراعظم عمران خان کہہ چکے نیں اوہناں نے آپ چیک کرایا کہ نوازشریف دی طبیعت خراب اے تے خود اوہناں دے ڈاکٹراں نے نوازشریف دی طبیعت نوں خراب قرار دتا سی۔ پیپلزپارٹی دے رہنما دا کہنا سی عمران خان دے اپنے اتحادی اوہناں توں تنگ نیں، پاکستان تحریک انصاف وچ تریڑاں پے چکیاں نیں، نویں الیکشن تے ان ہاؤس تبدیلی دا مطالبہ آئینی اے۔

اوہناں دا کہنا سی ملک وچ امن و امان دی صورتحال سنجیدہ اے جد کہ خارجہ محاذ تے وی حکومت بہت کمزور اے، حکومت ہور چلی تے پاکستان نوں ناقابل تلافی نقصان ہووے گا۔