قومی احتساب بیورو نے رانا ثناء تے میاں جاوید لطیف نوں طلب کر لیا

لہور: قومی احتساب بیورو نے رانا ثناء نوں 6مارچ جد کہ میاں جاوید لطیف نوں 13مارچ نوں طلب کر لیا۔ لیگی رہنماواں نوں نیب دی طلبی دے نوٹس موصول ہو گئے۔ وسیلیاں دے مطابق نیب تفتیشی ٹیم نے رانا ثنا نوں عدم تعاون تے سوالاں دے نامکمل جواب دین تے دوبارہ طلب کیتا اے، لیگی رہنما رانا ثناء نیب ترمیمی آرڈیننس دی آڑ وچ تفتیشی ٹیم نال پورا تعاون نہیں کر رہے۔ لیگی رہنما نیب ٹیم دے ساہمنے باضد نیں کہ اوہناں دی پراپرٹی داتخمینہ خریداری دے ویلے کے ڈی سی ریٹ دے مطابق لایا جاوے۔

ذرائع دے مطابق نیب لہور نے رانا ثناء دے دوجے بیانات دی روشنی وچ اوہناں دے جوائی تے دوجے اہل خانہ نوں وی شامل تفتیش کرن دا فیصلہ کیتا اے، ریکارڈ فراہم نہ کرن تے نیب دی ٹیم نوں کیس دی کاروائی اگے ودھان وچ مشکلات دا ساہمنا اے۔ رانا ثنا نوں جدوں وی نیب وچ طلب کیتا گیا اوہ وکھو وکھ جواز پیش کرکے سوالاں دے جوابات نہیں دیندے۔

ذرائع دے مطابق میاں جاوید لطیف وی مسلسل نیب ترمیمی آرڈیننس دا سہارا لے کے تفتیشی ٹیم نال تعاون نہیں کر ہرے، لیگی ایم این اے توں جنی واری وی سوالاں دے جوابات تے تفصیلات منگی گئیاں نیں اوہ ٹال مٹول نال کم لے رہے نیں۔