چیئرمین نیب دی زیر صدارت اجلاس، بدعنوانی دے دو ریفرنسز دائر کرن دی منظوری
اسلام آباد: قومی احتساب بیورو دے چیئرمین جاوید اقبال دی زیر صدارت ایگزیکٹو بورڈ دے اجلاس وچ کرپشن بارے ہور دو ریفرنسز دی منظوری دے دتی گئی۔ نیب اعلامیے دے مطابق سابق وزیر لیبر سندھ عادل صدیقی تے دوجیاں دے خلاف ریفرنس دی منظوری دتی گئی۔ ملزماں تے سرکاری زمین من پسند بندیاں نوں الاٹ کرن دا الزام اے۔ اوہناں نے غیر قنونی الاٹمنٹ نال قومی خزانے نوں 20کروڑ روپے توں ودھ دا نقصان اپڑایا۔ ایہدے علاوہ سابق سیکرٹری لینڈ یوٹیلائزیشن سندھ غلام مصطفی پھل تے دوجیاں دے خلاف وی ریفرنس دائر کرن دی منظوری دتی گئی۔
ملزمان نے سرکاری زمین نوں غیر قنونی طور تے ریگولرائز کیتا جہدے نال قومی خزانے نوں 300ملین دا نقصان ہویا۔ نیب ایگزیکٹو بورڈ دے اجلاس وچ پنج انویسٹی گیشنز دی وی منظوری دتی گئی۔ سابق ڈی جی ہیلتھ سندھ سنے دوجیاں دے خلاف وی انکوائری دا حکم دتا گیا۔ اجلاس وچ قائداعظم ہائیڈل پاور کمپنی انتظامیہ تے دوجیاں دے خلاف وی انکوائری اینٹی کرپشن پنجاب نوں گھلن دی ہدایت کیتی گئی۔ اجلاس دے دوران چیئرمین نیب جاوید اقبال آکھیا نیب دا ایمان کرپشن فری پاکستان اے۔ اسیں کیس نوں قنونی دائرے وچ منطقی انجام تک اپڑان تے یقین رکھنے آں۔
