لانگ مارچ:کنٹینر اُتے فائرنگ،1جاں بحق،عمران خان،فیصل جاوید سنے کئی زخمی

وزیرآباد/اسلام آباد/لاہور( پنجابی میڈیا گروپ)پاکستان تحریک انصاف(پی ٹی آئی) دے لانگ مارچ دے دوران سابق وزیراعظم دے کنٹینر اُتے فائرنگ ہوئی جس دی زَد وچ آ کے اک شخص جاں بحق ہو گیا،ایس واقعہ وچ عمران خان تے فیصل جاوید سنے10 افراد زخمی ہوئے نیں جدکہ چیئرمین پی ٹی آئی نوں پیر اُتے گولی لگن پاروں شوکت خانم ہسپتال لہور منتقل کردتا گیا اے۔تفصیل دے مطابق پی ٹی آئی دالانگ مارچ ایس ویلے وزیرآباد ول رواں دواں اے تے اوس دی اگلی منزل شہر وچ جلسہ کرن دی اے،ایس دوران عمران خان دے کنٹینر دے نیڑے نامعلوم افراد ولوں فائرنگ کیتی گئی۔فائرنگ پاروں 1شخص جاں بحق ہوگیااے جدکہ10افراد زخمی ہوگئے
جناں نوں فوری ہسپتال وچ علاج لئی منتقل کردتا گیا اے،زخمی ہون والیاں وچ عمران خان،سینیٹر فیصل جاوید،پی ٹی آئی رہنما احمد چٹھہ وی شامل نیں۔عینی شاہدین دا کہنا اے کہ 2وچوں 1حملہ آورگرفتار کرلیا گیا اے جدکہ دُوجا فرار ہون وچ کامیاب ہوگیا،عمران خان نوں پنڈلی اُتے گولی لگی اے۔پلس ولوں دسیا گیا اے کہ فائرنگ کرن والے مسلح شخص دا نام فیصل بٹ اے،حملہ آور نے فائرنگ لئی اے کے47رائفل استعمال کیتا۔
دُوجے پاسے وفاقی وزیر داخلہ رانا ثنا اللہ نے لانگ مارچ دے دوران ہون والی فائرنگ دی شدید لفظاں وچ مذمت کیتی اے تے گہری تشویش دااظہار کیتا اے تے وزیراعظم شہباز شریف دی ہدایت اُتے چیف سیکرٹری تے آئی جی پلس،وفاقی سکیورٹی ایجنسیاں توں وی فائرنگ واقعے دی رپورٹ منگ کر لئی اے۔وزیراعظم شہباز شریف نے وزیر آباد دے اللہ چوک وچ لانگ مارچ اُتے فائرنگ دے واقعہ دی شدید لفظاں وچ مذمت کیتی اے تے واقعے دی فوری طوراُتے رپورٹ منگ لئی اے۔وزیراعظم نے وزیرداخلہ رانا ثنا اللہ نوں آئی جی پنجاب پلس فیصل شاہکارتے چیف سیکرٹری پنجاب توں فوری طور اُتے رپورٹ کرن دی ہدایت کیتی اے۔
پاکستان تحریک انصاف دے رہنما اظہر مشوانی نے سماجی رابطے دی ویب سائٹ ٹوئٹر اُتے لکھیا کہ لانگ مارچ دے دوران کنٹینر دے نیڑے ہون والی فائرنگ توں بعد عمران خان الحمد للہ محفوظ نیں،ساڈی گرائونڈ ٹیم مطابق مشتبہ شخص نوںگرفتار کرلیا گیا اے،ایہ واقعہ اللہ ہو چوک وزیرآباد دے نیڑے پیش آیا۔