عمران خان دا منگل توں دوبارہ لانگ مارچ شروع کرن دا اعلان

لہور( پنجابی میڈیا)پاکستان تحریک انصاف(پی ٹی آئی) دے چیئرمین تے سابق وزیراعظم عمران خان نے منگل توں وزیرآباد توں لانگ مارچ دوبارہ شروع کرن دااعلان کردیاں ہویاں آکھیا کہ قافلے اوتھوں ہی روانہ ہون گے جیتھے گولیاں لگیاں۔لہور وچ نیوز کانفرنس کردیاں ہویاں عمران خان دا کہنا سی کہ ملک وچ عام آدمی نوںانصاف نہیں ملدا،ایہ کنج ہوسکدا اے ساڈی اپنی پلس منع کر رہی اے، چاہندا ہاں صاف تے شفاف تحقیقات ہونی چاہیدی اے،پنجاب وچ ساڈی حکومت اے،3دناں توں مقدمہ درج نہیں کروا پائے،سابق وزیراعظم کہہ رہیا اے کہ3لوگ ملوث نیں،جَد میں ایف آئی آر نہیں درج کروا پارہیا تے باقی قوم کیہ کرے گی؟پہلے اک ویڈیو نکلدی اے جس وچ آکھیا گیا میں مذہب دی توہین کردا ہاں،انویسٹی گیشن وچ پتا چلنا چاہیدا ویڈیو کنج لیک ہوئی؟اوہناں نے آکھیا کہ شہباز شریف نے جوڈیشل کمیشن دی گل کیتی میں ایس نوں ویلکم کردا ہاں،جناں3لوکاں دے نام لئے اوہناں دے ہُندیاں ہویاں شفاف تحقیقات نہیں ہوسکدی،پلس توں پوچھو ویڈیو کنج لیک ہوئی تے اوہ کہندے نیں کہ ساڈے اُتے دبا سی،مینوں یقین اے اینہاں3لوکاں نے سب کجھ کیتا اے،جوڈیشل کمیشن سب توں پہلاں ارشد شریف دے قتل دی تحقیقات کرے،اوہ کون لوگ سن جیہڑے فوری ری ایکٹ کردے نیں،گولی چلان والے داانٹرویو اک دم لیک کر دتا جاندا اے،میرے اُتے قاتلانہ حملے توں بعد جھوٹ اُتے جھوٹ بولیا گیا۔پی ٹی آئی چیئرمین داکہنا سی کہ چیف جسٹس کول سائفر آیا ہویا اے، تحقیقات کران سازش سی یا نہیں، میرے خلاف سب کجھ اسکرپٹ تحت کیتا گیا،اعظم سواتی دی ویڈیو دے معاملے دی تحقیقات ہونی چاہیدی اے،ملک دا سابق وزیراعظم اک ایف آئی آر درج نہیں کراسکدا،اعظم سواتی دے کول اصلی ویڈیو اے،اوہ سینیٹرنیں اوہناں دے نال ایہ سب کجھ ہورہیا اے،سائفر اُتے اگے گل کیوں نہیں کیتی جارہی؟