پاک فوج ساڈی اے :اوس دے خلاف جانا ممکن نہیں‘عمران خان

لہور(پنجابی میڈیا)پاکستان تحریک انصاف دے چیئرمین عمران خان نے حقیقی آزادی لانگ مارچ دی تریخ تبدیل کردیاں ہویاں آکھیا اے کہ مارچ ہُن کل(بدھ)وزیر آباد توں شروع ہوئے گا،پوری قوم تیار اے تے الیکشن دی تریخ لے کے ہی واپس آواں گے ،سرحداں اُتے کھڑے فوجی میرے بالاںونگوں نیں، پاک فوج ساڈی اے تے اوس دے خلاف جانا ممکن نہیں۔لہور وچ اپنی رہائشگاہ زمان پارک اُتے عمران خان نال صحافیاں دے وفد نے ملاقات کیتی۔ایس موقع اُتے گل بات کردیاں ہویاں اوہناں نے آکھیا کہ لانگ مارچ دے شیڈول وچ تبدیلی کردتی گئی اے، لانگ مارچ منگل دی بجائے پرسوں(بدھ)توں شروع ہوئے گا۔اوہناں نے آکھیا کہ آصف علی زرداری تے نوازشریف نال کَدی سمجھوتا نہیں ہو سکدا، پوری قوم ہُن تیار اے، الیکشن دی تریخ لے کے ہی واپس آواں گے تے میرا لانگ مارچ ہر صورت وچ منزل حاصل کرے گا۔عمران خان نے آکھیا کہ سرحداں اُتے کھڑے فوجی میرے بالاں ونگوں نیں،آرمی چیف دی تقرری میرا ایشو نہیں،پاک فوج ساڈی اے تے اوس دے خلاف جانا ممکن نہیں۔