مذاکرات لئی ساڈے دروازے جمہوریت پسند قوتاں لئی کھلے نیں:عمران خان

لہور( پنجابی میڈیا)پاکستان تحریک انصاف دے چیئرمین تے سابق وزیراعظم عمران خان نے آکھیا اے کہ ملکی مستقبل لئی تحریک انصاف دے دروازے ساریاں جمہوریت پسند قوتاں لئی کھلے نیں۔سماجی رابطے دی ویب سائٹ ٹویٹر اُتے اپنے اک بیان وچ پاکستان تحریک انصاف دے چیئرمین دا کہنا سی کہ وزیرآباد وچ پاکستان تحریک انصاف دے لانگ مارچ اُتے ہون والے حملے دی مضحکہ خیز ایف آئی آر دے معاملے اُتے میرے وکیل اپنا موقف دین گے۔میں ساری زندگی ملک نوں اک خوشحال فلاحی ریاست دے طوراُتے ویکھن داخواب ویکھیا تے میری پوری جدوجہد ایس خواب نوں قوم لئی حقیقت بنان لئی رہی اے۔انصاف، آزادی تے قومی خودمختاری دے میرے پیغام دی حمایت وچ اج قوم بیدار ہو چکی اے۔سابق وزیراعظم دا کہنا سی کہ جَد اسیں اپنے مقصد دے اینہے نیڑے ہاں تے کوئی خوف یا موت دا خطرہ میری جدوجہد نوں نہیں روک سکدا۔ساڈا پُرامن احتجاج تے مذاکرات صرف پاکستان دی حقیقی آزادی لئی نیں۔پاکستان دے مستقبل لئی تحریک انصاف دے دروازے ساریاں جمہوریت پسند قوتاں لئی کھلے نیں اوہ انصاف، قنون دی حکمرانی تے غیر ملکی غلامی توں آزادی لئی ساڈی جدوجہد وچ شامل ہون۔