سب توں سینئر افسر نوں آرمی چیف بنایا جائے گا:نوازوشہباز ملاقات وچ اہم فیصلہ

لندن( پنجابی میڈیا)وزیراعظم شہباز شریف تے مسلم لیگ(ن) دے قائد نواز شریف دے وچکار لندن وچ ہون والی اہم ملاقات وچ فیصلہ کیتا گیا اے کہ آرمی چیف دی تعیناتی وچ میرٹ نوںاولیت دتی جائے گی تے سب توں سینیئر افسر نوں آرمی چیف بنایا جائے گا۔ذرائع دا کہنا اے کہ نواز شریف تے شہباز شریف دیاں ملاقاتاں دے دوران اہم فیصلے کیتے گئے نیں، آرمی چیف دی تعیناتی اُتے وی سوچ وچار کیتا گیا تے فیصلہ کیتا گیا کہ سب توں سینیئر افسر نوںآرمی چیف بنایا جائے گا ،حکومت دے پاس جیہڑی لسٹ آئے گی اوس وچوں سب توں سینیئر افسر نوں آرمی چیف بنایا جائے گا تے میرٹ نوں اولیت دتی جائے گی۔وزیر اعظم شہباز شریف دا کہنا اے کہ آرمی چیف دی تعیناتی آئینی معاملہ اے، آئین دے مطابق طے ہوئے گا ۔ وزیر اعظم دی نوازشریف نال ملاقات، لانگ مارچ، آرمی چیف دی تقرری تے ہوراں کماں اُتے سوچ وچار کیتا گیا ذرائع دا کہنا اے کہ نواز ، شہباز میٹنگ وچ طے فیصلیاں اُتے پی ڈی ایم دی قیادت نوں وی اعتماد وچ لیا جائے گا۔ذرائع دے مطابق پاکستان روانہ ہون توں پہلاں وزیراعظم شہباز شریف نے نوازشریف تے مریم نواز دے نال 2گھنٹے توں وَدھ ویلا لنگیا۔بعد ازاں شہباز شریف پاکستان روانہ ہوگئے۔