نواز شریف اوس نوں آرمی چیف لائے گا جیہڑا اوس دی چوری بچائے گا: عمران خان

گجرات، کمالیہ(پنجابی میڈیا)پاکستان تحریک انصاف دے چیئر مین تے سابق وزیراعظم عمران خان ہوراں آکھیا اے کہ شہباز شریف مفرور نواز شریف دے نال مل کے آرمی چیف دی تعیناتی دا فیصلہ کرن جا رہے نیں۔ لندن وچ تماشہ ادارے مضبوط کرن لئی نہیں ہو رہیا۔ نواز شریف اوس نوں آرمی چیف بنائے گا جیہڑا اوس دی چوری بچائے گا۔ گجرات تے کمالیہ وچ لانگ مارچ دے رَلتیاں نال ویڈیو لنک ذریعے خطاب کردیاں ہویاں پاکستان تحریک انصاف دے چیئرمین آکھیاکہ 70 ورھیاں دی زندگی وچ پوری دنیا گھومیا ہاں، پاکستان دے حالات کیوں اینج دے نیں کہ دُنیا توں منگ کے ویلا لنگاندے نیں، وزیراعظم اوس شخص نال لندن وچ ملدا اے جیہڑا جھوٹ بول کے فرار ہو گیا سی، ایہ اوہی نواز شریف اے جیہڑا مشرف نال معاہدہ کر کے باہر دے ملک گیا سی،ایہ اوہی نواز اے جیہڑا جھوٹ بولدا رہیا ۔ شہباز شریف اپنے مفرور بھائی نوں لندن وچ ملدا اے جیہڑا سزا یافتہ اے، شہباز شریف خود وی اوہی شخص اے جس اُتے فرد جرم عائد ہون جا رہی سی، اوس شخص نوں پاکستان دا وزیراعظم بنا کے اداریاں اُتے بٹھا دتا گیا۔