سرکاری ملازمین دے بیوی تے بچے وی پوری پنشن دے حقدار قرار
لہور: ہائی کورٹ نے سرکاری ملازماں دے بیوی بچیاں نوں وی پوری پنشن دا حقدار قرار دے دتا اے۔ لہور ہائی کورٹ دی جج جسٹس عائشہ اے ملک تے مسٹر جسٹس عاصم حفیظ تے مشتمل 2رکنی بنچ نے سرکاری استاد دی بیوہ نوں پوری پنشن دا حق دار قرار دین دے فیصلے دے خلاف صوبائی سیکرٹری خزانہ تے اکاؤنٹنٹ جنرل پنجاب دی اپیلاں تے سماعت کیتی۔
عدالت عالیہ نے 13ورقیاں تے مشتمل تحریری فیصلہ جاری کر دتا۔ عدالت عالیہ نے اپیلاں رد کردیاں لہور ہائی کورٹ دے سنگل بنچ دے 15فروری 2019دے فیصلے نوں برقرار رکھیا اے، عدالتی فیصلے دے مطابق وزارت خزانہ یاں اکاؤنٹنٹ جنرل پنجاب نوں سرکاری خزانے تے کسٹوڈین بن کے من مانے فیصلے کرن دی ہرگز اجازت نہیں ہووے گی، جے کوئی مرد یاں عورت دوران سروس یاں نوکری دے بعد ریٹائر ہو جاوے تے اوہدے اہل خانہ فل پنشن دے حق دار نیں، ایسے طرح خاتون ملازمہ دوران ملازمت وفات یاں ریٹائرمنٹ دے بعد اوہدا شوہر فل پنشن دا حق دار ہووے گا، سابق ملازم دی بیوہ دے وفات دی صورت وچ اوہدے بچے ایس پنشن دے حق دار ہون گے۔
