پاکستان انڈیا نوں تباہ نہیں کرے گا، انڈیا خود اپنے آپ نوں تباہ کر لوے گا: عارف علوی
صدر مملکت ڈاکٹر عارف علوی دا کہنا اے پاکستان خطے وچ امن چاہندا اے، پاکستان انڈیا نوں تباہ نہیں کرے گا سگوں انڈیا خود اپنے آپ نوں تباہ کرے گا۔ اسلام آباد وچ سیمینار نال خطاب کردیاں صدر مملکت ڈاکٹر عارف علوی د اکہنا سی بھارت وچ جو کجھ ہو رہیا اے ایہدے تے بین الاقوامی برادری دے ردعمل دا ایہو ویلا اے۔ صدر مملکت دا کہنا سی بھارت وچ مسلمان، سکھ تے ہندو کمیونٹی سراپا احتجاج اے، راشٹریہ سویم سیوک سنگھ (آر ایس ایس) دے نفرت انگیز فلسفے نے گاندھی نوں وی قتل کیتا سی۔
اوہناں دا کہنا سی ہندو تے مسلمان امن پسند نیں پر بھارت وچ سیاستدان امن پسند نہیں نیں، میرے رشتے دار ہن وی بھارت وچ نیں، اوتھوں دی اندرونی صورتحال تے دکھ اے۔ مقبوضہ کشمیر دے حوالے اوہناں نے آکھیا کشمیر برصغیر دی تقسیم دا نامکمل ایجنڈا اے، پاکستان مسئلہ کشمیر تے کدی سمجھوتہ نہیں کرے گا۔
صدر پاکستان دا ایہ وی کہنا سی ساڈا تعلق کشمیریاں نال اے، کشمیر دی زمین نال نہیں، جہڑی کشمیریاں دی تصویراں منظرعام تے آ رہیاں نیں، ایہناں تصویراں نے پوری دنیا نوں ہلا دتا اے۔
