عاصم منیر آرمی چیف ، جنرل ساحر شمشاد مرزا جوائنٹ چیفس آفس سٹاف کمیٹی تعینات، صدر عارف علوی نے سمری اُتے دستخط کر دتے

اسلام آباد( پنجابی میڈیا)صدر مملکت ڈاکٹر عارف علوی نے جنرل عاصم منیر دی بطورِ آرمی چیف جدکہ جنرل ساحر شمشاد مرزا دی بطورِ چیئرمین جوائنٹ چیفس آف سٹاف کمیٹی دی تعیناتی دی سمری اُتے دستخط کر دتے نیں۔صدر مملکت ڈاکٹر عارف علوی نے عاصم منیر دی بطورِ آرمی چیف تے ساحر شمشاد دی بطورِ چیئرمین جوائنٹ چیفس آف سٹاف تقرری دے حوالے نال سمری اُتے دستخط کر دتے نیں۔ ایسی طرح جنرل عاصم منیر ملک دے17ویں آرمی چیف ہون گے۔ ذرائع دے مطابق جنرل عاصم منیر تے جنرل ساحر شمشاد تھوڑی دیر بعد صدر مملکت ڈاکٹر عارف علوی نال اہم ملاقات کرن گے، ایسی دوران آرمی چیف تے چیئرمین جوائنٹ چیفس آف سٹاف دا سکیورٹی پروٹوکول ایوان صدر اپڑن لگ پئیا۔ ایس توں پہلاں وزیر اطلاعات مریم اورنگزیب نے ٹوئٹر اُتے لکھیا سی کہ وزیراعظم شہباز شریف نے آئینی اختیار استعمال کردیاں ہویاں ساحر شمشاد مرزا نوں چیئرمین جوائنٹ چیفس آف سٹاف تے سید عاصم منیر نوں چیف آف دی آرمی سٹاف مقرر کرن دا فیصلہ کیتا اے۔ یاد رہے کہ سبکدوش ہون والے چیف آف آرمی اسٹاف جنرل قمر جاوید باجوہ نوں دراصل2019 وچ ریٹائر ہونا سی لیکن اوہناں دی ریٹائرمنٹ توں 3 مہینے پہلاں وزیر اعظم عمران خان نے اگست2019 وچ اوہناں دی مدت ملازمت وچ 3 ورھیاں دی توسیع کردی سی۔