آرمی چیف دے اثاثیاں بارے اعدادو شمار گمراہ کُن نیں،آئی ایس پی آر

پنڈی( پنجابی میڈیا گروپ)آئی ایس پی آر نے آرمی چیف جنرل قمر جاوید باجوہ تے اوہناں دے گھر والیاں دے اثاثیاں بارے سوشل میڈیا اُتے جاری کیتے گئے اعداد و شمار نوں گمراہ کُن قرار دے دتا ۔آئی ایس پی آر دا اپنے بیان وچ کہنا سی کہ گمراہ کن اعداد و شمار مفروضاں دی بنیاداُتے ودھا چڑھا کے پیش کیتے گئے نیں جناںدا حقیقت نال کوئی تعلق نہیں ۔ ترجمان دا کہنا سی کہ اک خاص گروپ نے نہایت چالاکی تے بددیانتی نال جنرل باجوہ دی بہو دے والد(سمدھی)تے فیملی دے اثاثیاں نوں آرمی چیف تے خاندان توں منسوب کیتا، ایہ سراسر غلط تاثر دتا جا رہیا اے کہ ایہ اثاثے آرمی چیف جنرل باجوہ دے 6سالہ دور وچ اوہناں دے سمدھی دی اہل خانہ نے بنائے۔ایہ قطعی طور اُتے حقائق دے منافی تے کھلا جھوٹ تے بدنیتی اُتے مبنی اے۔آرمی چیف جنرل قمر جاوید باجوہ، اوہناں دی گھر والی تے خاندان دا ہر اثاثہ ایف بی آر وچ باقاعدہ ڈکلیئرڈ اے، آرمی چیف تے خاندان باقاعدگی نال ٹیکس ریٹرن فائل کردے نیں۔آئی ایس پی آر نے واضح کیتا کہ ہر شہری ونگوں آرمی چیف تے اوہناں دی فیملی ٹیکس حکام سامنے اپنے اثاثیاں بارے جواب دہ نیں۔